ოკუპირებული ყირიმის ტერიტორიაზე აფეთქება მოხდა. წინასწარი მონაცემებით, დაშავებულია ორი ადამიანი. ინფორმაციას „ბიბისი“ ავრცელებს.
აფეთქება ყირიმის ჩრდილოეთით, სოფელ მაისკოეში მოხდა, ქალაქ ჯანკოედან 20 კილომეტრში. როგორც „ბიბისი“ წერს, რუსეთის თავდაცვის სამინისტრომ მომხდარი საბრძოლო მასალის საცავში გაჩენილი ხანძრით ახსნა.
მოგვიანებით, ყირიმის რესპუბლიკის ე.წ. ხელმძღვანელმა, სერგეი აკსენოვმა განაცხადა, რომ აფეთქების შედეგად ორი ადამიანია დაშავებული. მისი თქმით, მიმდებარე ტერიტორიებიდან ორი ათასი ადამიანის ევაკუაცია იქნა განხორციელებული.
ადგილობრივი მედია წერს, რომ აფეთქებები ორ ადგილას მოხდა – სოფელ მაისკოში და ქალაქ ჯანკოეში, თუმცა ოფიციალური განცხადება აღნიშნულის შესახებ არც უკრაინულ და არც რუსულ მხარეს არ გაუკეთებია.
აფეთქებას გამოეხმაურნენ უკრაინის პრეზიდენტის ოფისში. მიხაილ პოდოლიაკის განცხადებით, ნორმალური ქვეყნის ყირიმი დაკავშირებულია შავ ზღვასთან, მთებთან, დასვენებასა და ტურიზმთან, ხოლო რუსების მიერ ოკუპირებული ყირიმი დაკავშირებულია საწყობების აფეთქებასთან და მაღალ რისკთან.
აღსანიშნავია, რომ ყირიმში აფეთქება ერთი კვირის წინაც მოხდა, საკის რაიონში მდებარე ნოვოფედოროვკას აეროდრომზე, რომლის შედეგად ერთი ადამიანი გარდაიცვალა და შვიდი დაშავდა.
