ამერიკული იარაღი დაეხმარება უკრაინას დაიბრუნოს რუსეთის მიერ ოკუპირებული ტერიტორიები, მათ შორის ყირიმი და დონბასი, - ამის შესახებ უკრაინის თავდაცვის მინისტრმა, ოლექსი რეზნიკოვმა CNN-თან ინტერვიუში განაცხადა.
„ვაპირებთ, გავათავისუფლოთ ჩვენი ყველა ტერიტორია, ყირიმის ჩათვლით. ყირიმი უკრაინის სტრატეგიული მიზანია, რადგან ის უკრაინის ტერიტორიაა", - განაცხადა რეზნიკოვმა.
კითხვაზე, ხომ არ გამოიწვევს სამხედრო საშუალებებით ყირიმის დაბრუნების მცდელობა რუსეთის შემდგომ პროვოცირებას, რომელიც ყირიმს რუსეთის ფედერაციის ნაწილად მიიჩნევს, რეზნიკოვმა უპასუხა, რომ ეს არ არის განხილვის თემა.
„ამას მნიშვნელობა არ აქვს. იმიტომ, რომ ისინი [რუსები] ნახავენ ამას ხერსონში, ნახავენ ამას ზაპორიჟიეში, მარიუპოლში. ეს არის უკრაინული მიწები და ყირიმიც უკრაინული მიწაა, რაც არ უნდა მოხდეს“, - განუცხადა მან СNN-ს.
რეზნიკოვის თქმით, აშშ-ის თავდაცვის მინისტრმა, ლოიდ ოსტინმა, გაერთიანებული სამეფოს თავდაცვის მინისტრმა, ბენ უოლასმა და სხვა დასავლური ქვეყნების თავდაცვის უწყებების წარმომადგენლებმა უთხრეს, რომ უკრაინისთვის სამხედრო მხარდაჭერის აღმოჩენა "არასოდეს შეჩერდება".
"ოლექსი, ნუ ღელავ, ჩვენ არ გავჩერდებით. ჩვენ გავაგრძელებთ თქვენი ქვეყნის, თქვენი ხალხისა და თქვენი პრეზიდენტის დახმარებას. გუშინ მოვისმინე და აბსოლუტური გულწრფელობა ვიგრძენი, ვნახე ლოიდ ოსტინის თვალები, დავინახე, რომ ისინი არასოდეს გაჩერდებიან“, - განაცხადა უკრაინის თავდაცვის მინისტრმა.
