საქართველოს პრემიერ-მინისტრობის კანდიდატი ირაკლი კობახიძე აცხადებს, რომ საქართველოს პრეზიდენტის, სალომე ზურაბიშვილის წლიურ ანგარშში საინტერესო არაფერი იყო.
როგორც კობახიძემ აღნიშნა, პრეზიდენტმა დაადასტურა, რომ ის აპირებს შექმნას ფსევდოშუაშისტური პოლიტიკური ძალა.
„პრეზიდენტის გამოსვლაში საინტერესო არ იყო არაფერი. ერთადერთი რამ იყო საინტერესო – მან დაასტურა რეალურად ის გეგმები, რაზეც ჩვენ ვსაუბრობდით. აშკარად ის აპირებს, შექმნას ფსევდოშუაშისტური პოლიტიკური ძალა. ამისთვის გადადგება სექტემბერში და არჩევნებში მიიღებს მონაწილეობას. ეს იყო ერთადერთი საინტერესო, რაც შეიძლება, ამოვიკითხოთ მისი გამოსვლიდან. დანარჩენი იყო რადიკალური ოპოზიციის წარმომადგენლის ერთი ჩვეულებრივი გამოსვლა“, – განაცხადა კობახიძემ.
ჟურნალისტებმა კობახიძეს კითხვა დაუსვეს საქართველოს პრეზიდენტის, სალომე ზურაბიშვილის წლიურ მოხსენებასთან დაკავშირებით, სადაც ზურაბიშვილმა ბიძინა ივანიშვილს მიმართა.
„ერთადერთი, ვისაც აქვს კითხვებზე პასუხი გასაცემი, ეს არის თვითონ სალომე ზურაბიშვილი, რომელიც გამოირჩევა კონსტიტუციის დარღვევით, სახელმწიფოებრიობის წინააღმდეგ მოქმედებით, ჩვენი ევროპული ინტერგაციის წინააღმდეგ მოქმედებით. მან უნდა გასცეს პასუხები კითხვებს, რომლებიც აქვს ფართო საზოგადოებას სწორედ სალომე ზურაბიშვილის მიმართ“, – განაცხადა ირაკლი კობახიძემ.
