რუსეთმა საპასუხო ზომების სახით ევროკავშირის ხელმძღვანელობა „შავ სიაში“ შეიყვანა. ამის შესახებ რუსული მედია ქვეყნის საგარეო საქმეთა სამინისტროზე დაყრდნობით ავრცელებს.
„შეზღუდვები ვრცელდება ევროკავშირის უმაღლეს ხელმძღვანელობაზე, მათ შორის რიგ ევროკომისრებზე და ევროკავშირის სამხედრო სტრუქტურების ხელმძღვანელებზე, ასევე ევროპარლამენტის დეპუტატების დიდ უმრავლესობაზე, რომლებიც ანტირუსულ პოლიტიკას ატარებენ“, – აღნიშნავენ რუსეთის საგარეო უწყებაში.
ამას გარდა, შემზღუდავი ზომები შეეხო ევროკავშირის ზოგიერთი წევრი ქვეყნის მთავრობისა და პარლამენტის წარმომადგენლებს, ასევე საზოგადო მოღვაწეებსა და მედიის თანამშრომლებს, რომლებსაც, რუსული მხარის განცხადებით, „პერსონალური პასუხისმგებლობა ეკისრებათ უკანონო ანტირუსული სანქციების წინ წაწევაზე, რუსოფობიური განწყობების გაღვივებაზე, რუსულენოვანი მოსახლეობის უფლებებისა და თავისუფლებების შელახვაზე“.
