თბილისის სატრანსპორტო კომპანიის ინფორმაციით, 27 ივნისიდან დედაქალაქის საზოგადოებრივი ტრანსპორტის ქსელში ცვლილებები ამოქმედდება. ცვლილებები შეეხება როგორც N321 მარშრუტს, ისე N293 ხაზს და მიზნად მგზავრთა მომსახურების ხარისხის გაუმჯობესებასა და გადაადგილების ხელმისაწვდომობის ზრდას ისახავს.
კომპანიის განცხადებით, N321 მარშრუტზე მოძრაობას 18-მეტრიანი, მაღალი ტევადობის ავტობუსები დაიწყებს. აღნიშნული ტიპის ავტობუსები ერთდროულად უფრო მეტი მგზავრის გადაყვანის შესაძლებლობას იძლევა, რაც განსაკუთრებით მნიშვნელოვანია იმ მონაკვეთებზე, სადაც პიკური საათების განმავლობაში მგზავრთა ნაკადი მაღალია. ახალი ავტობუსების ჩართვა ხელს შეუწყობს გადატვირთულობის შემცირებას, მგზავრობის კომფორტის გაზრდასა და ლოდინის დროის ოპტიმიზაციას.
ამასთან, ცვლილებები შეეხება N293 მარშრუტსაც. თბილისის სატრანსპორტო კომპანიის გადაწყვეტილებით, აღნიშნულ ხაზს ორი ერთეული ავტობუსი დაემატება. დამატებითი სატრანსპორტო საშუალებების ჩართვა რეისების ინტენსივობის გაზრდას და ინტერვალების შემცირებას უზრუნველყოფს, რაც მოსახლეობისთვის გადაადგილებას კიდევ უფრო მოსახერხებელს გახდის.
შეგახსენებთ, N321 ავტობუსი მეტროსადგურ „სარაჯიშვილიდან“ დიდი დიღმის IV მიკრორაინის მიმართულებით მოძრაობს, ხოლო N293 მარშრუტი დიდი დიღმის მოსახლეობას მეტროსადგურ „სარაჯიშვილთან“ აკავშირებს.
