Wizz Air მადრიდის მიმართულებით ფრენებს ანახლებს. ამის შესახებ ინფორმაციას სამოქალაქო ავიაციის სააგენტო ავრცელებს.
მათივე ცნობით, Wizz Air ქუთაისი-ლიონი-ქუთაისის საჰაერო ხაზზე ოპერირებას იწყებს.
„მიმდინარე წლის ზაფხულის სანავიგაციო სეზონიდან, უნგრული დაბალბიუჯეტური ავიაკომპანია Wizz Air-ი ქუთაისის საერთაშორისო აეროპორტიდან ახალ რეგულარულ მიმართულებას ამატებს.
საქართველოს სამოქალაქო ავიაციის სააგენტოში ავიაკომპანიის მიერ წარმოდგენილი განაცხადის შესაბამისად, ქუთაისი - ლიონი - ქუთაისის საჰაერო ხაზზე რეგულარული საჰაერო მიმოსვლა 3 ივნისიდან, კვირაში 2 სიხშირით, ყოველ სამშაბათსა და შაბათს განხორციელდება.
ამასთან, Wizz Air Hungary ოპერირებას განაახლებს ქუთაისი - მადრიდი - ქუთაისის საჰაერო ხაზზე. აღნიშნული მიმართულებით ავიაკომპანია ფრენებს 2023 წლის ივნისიდან 2024 წლის მარტამდე ახორციელებდა. ავიარეისები განახლდება 29 აპრილიდან და შესრულდება კვირაში 2 სიხშირით, ყოველ სამშაბათს და შაბათს.
საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტომ, ავიაკომპანიას ფრენების შესრულებისათვის აუცილებელი ნებართვა მიმდინარე წლის 17 მარტს მიანიჭა,“ - ნათქვამია სამოქალაქო ავიაციის სააგენტოში.
