ავიაკომპანია Wizz Air ისრაელის, დუბაის, აბუ-დაბის, ამანისა და საუდის არაბეთის მიმართულებით ყველა ფრენას აჩერებს. ამის შესახებ კომპანიის ოფიციალურ განცხადებაშია ნათქვამი.
ავიაკომპანიის მიერ გავრცელებული ინფორმაციის მიხედვით, ფრენები 7 მარტის ჩათვლით უქმდება.
კომპანიაში განმარტავენ, რომ მუშაობენ საავიაციო უწყებებთან, სამთავრობო სააგენტოებთან და აეროპორტის პარტნიორებთან ერთად, რათა ოპერირება რაც შეიძლება მალე განახლდეს.
„ირანში უსაფრთხოების ვითარების ბოლო დროინდელი ესკალაციის ფონზე, 2026 წლის 7 მარტის ჩათვლით, ავიაკომპანია „ვიზეარი“ დაუყოვნებლივ აჩერებს ყველა რეისს ისრაელის, დუბაის, აბუ დაბისა და ამანის მიმართულებით და აღნიშნული მიმართულებებიდან.
ჩვენი გუნდები ყურადღებით აკვირდებიან მოვლენების განვითარებას და მუშაობენ საავიაციო უწყებებთან, სამთავრობო სააგენტოებთან და აეროპორტის პარტნიორებთან ერთად, რათა ოპერირება რაც შეიძლება მალე განახლდეს, როგორც კი პირობები ამის საშუალებას მოგვცემს.
ამჟამად, საჰაერო სივრცის შეზღუდვები და უსაფრთხოების ზომები, რაც ჩვენს კონტროლს მიღმაა, გავლენას ახდენს დაგეგმილ რეისებზე. ჩვენ განვიხილავთ ყველა შესაძლო ვარიანტს დაზარალებული მგზავრების მხარდასაჭერად.
გთხოვთ, დარწმუნდეთ, რომ თქვენს ჯავშანში მითითებული საკონტაქტო მონაცემები განახლებულია და თვალი ადევნეთ თქვენს ელექტრონულ ფოსტას სიახლეების მისაღებად.
ჩვენ გულწრფელად ვაფასებთ თქვენს მოთმინებასა და გაგებას ამ პერიოდში", - წერია გავრცელებულ განცხადებაში.
შეგახსენებთ, რომ ახლო აღმოსავლეთში 28 თებერვლიდან მიმდინარეობს ინტენსიური საბრძოლო მოქმედებები, მას შემდეგ, რაც ისრაელმა და ამერიკის შეერთებულმა შტატებმა ირანის წინააღმდეგ მასშტაბური სამხედრო ოპერაცია დაიწყეს, ირანმა კი საპასუხო შეტევა მიიტანა ისრაელზე და შეერთებული შტატების სამხედრო ბაზებზე კატარში, არაბთა გაერთიანებულ საამიროებში, ბაჰრეინში, საუდის არაბეთსა და ქუვეითში.
28 თებერვალს ირანზე ისრაელის და აშშ-ის დარტყმების შედეგად მოკლულია ისლამური რესპუბლიკის უზენაესი ლიდერი, აიათოლა ხამენეი და არაერთი მაღალჩინოსანი, მათ შორის შეიარაღებული ძალების ხელმძღვანელები.
