„სინოფარმის“ ავტორიზაცია შეიძლება გახანგრძლივდეს, მაგრამ ამან არ უნდა შეაფერხოს ქვეყანაში ვაქცინაციის პროცესი, - ამის შესახებ ჯანდაცვის მინისტრის მოადგილემ თამარ გაბუნიამ იმუნიზაციის საბჭოს სხდომის შემდეგ ბრიფინგზე განაცხადა, რითაც უპასუხა კითხვას, დაიწყება თუ არა „სინოფარმით“ ვაქცინაცია იმ შემთხვევაში, თუ ეს ვაქცინა ავტორიზაციას აპრილის ბოლოს არ მიიღებს.
მისივე თქმით, „სინოფარმის“ გვერდითი მოვლენების მაჩვენებელი სხვა ვაქცინებთან შედარებით დაბალია.
„სინოფარმის“ თაობაზე საკმარისად ბევრი და კარგი მონაცემი არსებობს, 35 ქვეყნის ავტორიზაცია არის და გადაუდებელი აუცილებლობისთვის ჩვენმა ქვეყანამაც გაუშვა ბაზარზე. რაც შეეხება ავტორიზაციას, შესაძლოა, გახანგრძლივდეს, ან შესაძლოა აპრილის ბოლოს დასრულდეს, თუმცა ამან არ უნდა შეაფერხოს ქვეყანაში ვაქცინაციის პროცესი. ვინაიდან ეპიდემიოლოგიური რისკები მაღალია, იკეთება ის, რომ „სინოფარმთან“ დაკავშირებული მოსალოდნელი სარგებელი მეტია, ვიდრე რაიმე გვერდითი მოვლენა, მისი გვერდითი მოვლენების მაჩვენებელი დაბალია, სხვა ვაქცინებთან შედარებით“,- განაცხადა გაბუნიამ.
მინისტრის მოადგილის განმარტებით, არსებული მონაცემების მიხედვით „სინოფარმი“ ახალგაზრდა ასაკობრივ ჯგუფებში მეტად ეფექტიანია და ამიტომ შესაძლოა, ამ ვაქცინას 60 წლამდე ასაკობრივ ჯგუფში მეტი უპირატესობა მიენიჭოს.
„სინოფარმის“ ეფექტურობაზე მონაცემები არის უფრო მდიდარი, შედარებით ახალგაზრდა ასაკობრივ ჯგუფში, 60 წლის ზემოთ ასაკში „სინოფარმის“ ეფექტურობის შესახებ მონაცემი ნაკლებია, ამიტომ შესაძლებელია, გადაწყვეტილება იქნეს მიღებული, რომ „სინოფარმს“ 60 წლამდე ასაკობრივ ჯგუფში მეტად მიენიჭოს უპირატესობა.
„სინოფარმთან“ დაკავშირებით არსებობს მონაცემები მისი ეფექტურობის შესახებ და ის არის 76-78%. ეს არის ახალი შემთხვევების გადადების თავიდან აცილების კუთხით, რაც შეეხება მძიმე შემთხვევის განვითარებას და გარდაცვალების რისკების თავიდან აცილების შესაძლებლობას, ეს მაჩვენებელი ბევრად მაღალია“,- განაცხადა გაბუნიამ.
ამასთან, გაბუნიამ ისაუბრა „სინოვაკის“ ვაქცინაზეც და აღნიშნა, რომ მისი დონაციის საკითხი განიხილება.
„სინოვაკის“ დონაციის საკითხი განიხილება. ერთ-ერთი პირობა, რომელიც დავაყენეთ, ეს არის ჯანმრთელობის მსოფლიო ორგანიზაციის ავტორიაზაცია, რადგან „სინოვაკის“ გამოყენებასთან დაკავშირებით ნაკლები მოაცემი გვქონდა, ვიდრე „სინოფარმთან“ დაკავშირებით, ამდენად „სინოვაკის“ საკითხი ამ ეტაპზე საბჭოს არ დაუყენებია, მაგრამ ამას დავუბრუნდებით“,- განაცხადა გაბუნიამ.
შეგახსენებთ, რომ 27 აპრილიდან კორონავირუსის საწინააღმდეგო ჩინური „სინოფარმით“ ვაქცინაციისთვის რეგისტრაცია შესაძლებელი იქნება.
