საყოველთაო ჯანდაცვის პროგრამის ამოქმედებამდე ჩვენს მოქალაქეებს სამედიცინო სერვისების მისაღებად უხდებოდათ საცხოვრებლის გაყიდვა თუ იპოთეკით დატვირთვა და ამ კუთხით ძალიან მძიმე მდგომარეობა იყო, – ამის შესახებ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, ზურაბ აზარაშვილმა საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“ განაცხადა.
„10 წლის შედეგებს თუ შევაჯამებთ, ამ მიმართულებით დახარჯული გვაქვს შვიდ მილიარდ ლარამდე. ჩვენ ირგვლივაც ყველამ ვიცით, რომ ათასობით ადამიანის სიცოცხლე გადარჩა და ადამიანს დაუბრუნდა ყველაზე მნიშვნელოვანი უფლება, რასაც ჯანმრთელობის და სიცოცხლის უფლება ჰქვია. ეს ამ პროგრამამ ნამდვილად შეძლო“, – აღნიშნა აზარაშვილმა.
გადაცემის წამყვანის შეკითხვაზე, რა არის დღეს, 10 წლის თავზე საყოველთაო ჯანდაცვის პროგრამის მთავარი გამოწვევა, რაც ამ პროგრამის ეფექტიანობას აფერხებს, ზურაბ აზარაშვილმა განაცხადა, რომ ისევ გამოწვევად რჩება სამედიცინო მომსახურების ხარისხი, რაზეც აქტიური მუშაობა მიდის, თუმცა რამდენადაც 2013 წლამდე ბაზარი სრულიად დერეგულირებული იყო, სამედიცინო მომსახურება არ კონტროლდებოდა და არანაირი სტანდარტი არ არსებობდა, ამ მიმართულებით სამუშაო კვლავ ბევრია.
„მეორე მნიშვნელოვანი გამოწვევა არის ფინანსების ეფექტიანად ხარჯვა. სახელმწიფო დღესაც მზად არის, მნიშვნელოვნად გაზარდოს საყოველთაო ჯანდაცვის პროგრამის მოცვა და ბიუჯეტი, თუმცა, პირველ რიგში, უნდა დავრწმუნდეთ ხარისხიანად მომსახურების ნაწილში და მეორე, აუცილებლად უნდა დავრწმუნდეთ, რომ ფინანსურად, სწორად და ეფექტიანად იხარჯებოდეს თანხები“, – განაცხადა აზარაშვილმა.
როგორც ზურაბ აზარაშვილმა აღნიშნა, თანხების ხარჯვასთან დაკავშირებით ადგილი აქვს არაკეთილსინდისიერ ქმედებებს და სწორედ ამიტომ მოხდა DRG პროგრამის შემოღება, რათა არ მოხდეს ხელოვნურად გაძვირებული სამედიცინო ჩარევები და სახელმწიფომ გადაიხადოს ის, რაც ნამდვილად ღირს.
ჯანდაცვის მინისტრმა მადლობა გადაუხადა იმ მედპერსონალს და კლინიკებს, რომლებიც ხალხს და ქვეყანას 10 წლის განმავლობაში კეთილსინდისიერად, ღირსეულად და გულწრფელად ემსახურებოდნენ.
