საქართველოს კალათბურთის ფედერაციის პრეზიდენტის, ვიქტორ სანიკიძის თქმით, ქართული მხარე იმედოვნებს, რომ უკრაინის ნაკრების მწვრთნელის ჟესტზე FIBA-ს სადისციპლინო კომიტეტი იმსჯელებს და რეაგირებაც ექნება. ამის შესახებ სანიკიძემ, რომელიც საქართველოსა და უკრაინის მატჩს ესწრებოდა, რ2-თან საუბარში განაცხადა.
ლატვიაში უკრაინისა და საქართველოს ნაკრების მატჩი ინციდენტით დასრულდა. უკრაინელთა ლატვიელმა მწვრთნელმა აინარს ბაგატსკისმა ქართველ სპორტსმენებს ხელი არ ჩამოართვა, შემდეგ კი, სავარაუდოდ, ქართველთა მწვრთნელის, ილიას ზუროსის მისამართით უხამსი ჟესტიც აჩვენა.
მატჩი უკრაინელთა გამარჯვებით დასრულდა. თამაშის ბოლოს, როდესაც უკრაინელთა უპირატესობა უკვე ნათელი და გარანტირებული იყო, ბაგატსკისი კვლავ შეტევას ცდილობდა, რასაც ქართული მხარის გაღიზიანება მოჰყვა.
“ძალიან სამწუხაროა ეს ფაქტი, რა თქმა უნდა, მაგრამ ყველამ, როგორც მოგება, ასევე წაგებაც ღირსეულად უნდა მიიღოს. ამ შემთხვევაში უკრაინის ნაკრების მწვრთნელისგან ძალიან უღირს საქციელს ჰქონდა ადგილი.
მიუხედავად იმისა, რომ შიდა საერთაშორისო წესების დარღვევას ადგილი არ ჰქონია, არსებობს რაღაც მორალური მხარე, რაც დაუწერელი კანონია, როდესაც უპირატესობით იგებ და ბოლო წამზე უკვე წუთშესვენებას აღარ იღებ და გარანტირებულად გამარჯვების შემთხვევაში ზედმეტ ქულებზე აღარ არის აქცენტი, არის ყოვლად უღირსი საქციელი, სპორტში ასე ჰქვია ამ ყველაფერს.
ამასაც რომ თავი დავანებოთ, ჟესტიკულაცია და ის, რაც მან იკადრა მატჩის ბოლოს, ეს წესებსაც სცდება და იმედია, FIBA-ს სადისციპლინო კომიტეტი ამას განიხილავს და ჩვენ, ჩვენი მხრიდან აუცილებლად გვექნება ამაზე რეაგირება და მოვითხოვთ, რომ მოჰყვეს სათანადო რეაგირება.
გარდა ამისა, ეს მწვრთნელი არ არის ჩვენთვის უცხო. ის საქართველოში მოღვაწეობდა და ჩვენს მეგობრად მოიაზრებოდა, ჩვენ ძალიან კარგი ურთიერთობა გვქონდა და ყველანაირ ზღვარს გასცდა ეს საქციელი. ძალიან სამწუხარო ფაქტია.
გამართლება არ აქვს იმიტომ, რომ მწვრთნელმა სცადა უკრაინის ფედერაციის პრეზიდენტთან საუბარი, უკრაინის ფედერაციის პრეზიდენტმა პირადად ბოდიში მოიხადა ამ საქციელის გამო. ეს, რაც იკადრა, მწვრთნელის გადაწყვეტილება იყო.
რაც შეეხება მოთამაშეებს, რა თქმა უნდა, არაფერი, ეს სპორტის, თამაშის იქით არ მიდის, მოთამაშეებს შორის ურთიერთობაზე არ მოქმედებს. მწვრთნელის პასუხისმგებლობა არის თავიდან ბოლომდე ეს საქციელი”, – განაცხადა ვიქტორ სანიკიძემ.
ბაგატსკისი 2011 წელს ქართულ საკალათბურთო კლუბ “სოხუმს” წვრთნიდა.
