ქუთაისში, საქართველოს ბანკში შეჭრილი 3 საათში 2 მლნ დოლარს ითხოვს. აღნიშნული მოთხოვნა თავდამსხმელმა ვიდეოლაივის საშუალებით გაავრცელა.
შეგახსენებთ, შსს-ს მიერ 12:00 საათისთვის გავრცელებული ინფორმაციით, სამინისტროს შესაბამისი დანაყოფების თანამშრომლები ქუთაისში, შოთა რუსთაველის გამზირზე მდებარე ბანკთან მობილიზებული არიან.
"პირველადი ინფორმაციით, "საქართველოს ბანკის" ფილიალში შეჭრილია შეიარაღებული პირი. პოლიციის თანამშრომლებმა თავდასხმის შესახებ შეტყობინების მიღებისთანავე, მყისიერი რეაგირების რეჟიმში შემოსაზღვრეს შემთხვევის ადგილის მიმდებარე ტერიტორია. ამჟამად ადგილზე მობილიზებული სამართალდამცველები ყველა საჭირო და გადაუდებელ პროცედურას ატარებენ, ასევე მიმდინარეობს საგამოძიებო და ოპერატიული ღონისძიებები.
შინაგან საქმეთა სამინისტრო მოუწოდებს მედიის წარმომადგენლებს და მოქალაქეებს - დაიცვან უსაფრთხოების ნორმები და დაემორჩილონ ადგილზე პოლიციელთა მითითებებს", - ნათქვამია შს სამინისტროს განცხადებაში.
ამ დროისთვის გავრცელებული ინფორმაციით, ბანკში დაახლოებით 10-მდე მოქალაქე იმყოფება.
