20 აპრილიდან თბილისის შოთა რუსთაველის სახელობის საერთაშორისო აეროპორტში ოპერირებას ნიდერლანდების სამეფოს დაბალბიუჯეტურის ავიაკომპანია Transavia დაიწყებს. ავიაკომპანია ამსტერდამი-თბილისი-ამსტერდამის მიმართულებით პირდაპირ
რეგულარულ ფრენებს კვირაში 2 სიხშირით (ოთხშაბათსა და შაბათს) განახორციელებს. საქართველოს აეროპორტების გაერთიანების გენერალური დირექტორის, ირაკლი ქარქაშაძის განცხადებით, 2023 წელს ავიაკომპანიასთან დაწყებული აქტიური მოლაპარაკებების პროცესი წარმატებით დასრულდა.
,,მოხარულები ვართ, რომ ზაფხულის სანავიგაციო სეზონს მორიგი სასიამოვნო სიახლით ვიწყებთ და საქართველოს ავიაბაზარზე კიდევ ერთი ევროპული ავიაკომპანია შემოდის. ჩვენ უკვე ვხედავთ ევროკავშირის კანდიდატი სტატუსის პირველ შედეგებს. Austrian Airlines-იs შემდეგ, თბილისის საერთაშორისო აეროპორტში ოპერირებას აპრილიდან Transavia დაიწყებს. ავიაკომპანიის მენეჯმენტთან აქტიური მოლაპარაკებები საქართველოს აეროპორტების გაერთიანებამ საავიაციო ფორუმ ‘’Routes EUROPE-‘’ისა და ‘’Routes World-ის“ ფარგლებში ვაწარმოებთ, რომელიც წარმატებით დასრულდა. ბილეთები ამსტერდამი-თბილისის მიმართულებით უკვე გაყიდვაშია და მგზავრებს ავიაკომპანიის საიტზე შეძენა შეუძლიათ,‘’ -განაცხადა ირაკლი ქარქაშაძემ.
Transavia ნიდერლანდების სამეფოს დაბალბიუჯური ავიაკომპანიაა, რომელიც ბაზარზე 1966 წლიდან ოპერირებს. ავიაკომპანია Air France KLM ჯგუფის შვილობილი კომპანიაა და ამ ეტაპზე ფლოტში ბოინგის ტიპის საჰაერო ხომალდები ჰყავს.
