„ეისითი“ (ACTR) კვლევის ცენტრმა ჩაატარა საზოგადოებტივი აზრის კვლევა, რომელიც ასახავს საქართველოში სერვისებისა და მომსახურების კუთხით მომხმარებელთა კმაყოფილების დონესა და მოლოდინებს.
კვლევის თანახმად, საქართველოს მოსახლეობამ მომსახურების ხარისხი საშუალოზე მაღალი ქულით შეაფასა: 10-ბალიანი სკალით 7.04 ქულა, რაც 2023 წელთან შედარებით, 0.4 ქულით არის გაზრდილი.
აღსანიშნავია, რომ 2025 წელს ლიდერ პოზიციას იკავებდა სააფთიაქო მომსახურება 8.75 ქულიანი შეფასებით. მეორე და მესამე ადგილებზე კი გასართობ-შემეცნებითი (8.26 ქულა) და სილამაზისა და თავის მოვლის მომსახურებები (8.24 ქულა) იყო.
„2023 წელს, ტოპ სამეულში შედიოდა მიტანის სერვისებიც (8.2 ქულა), რომლის კმაყოფილების მაჩვენებელიც 2025 წელს შემცირდა, რაც შესაძლოა, დაკავშირებული იყოს სერვისის ხარვეზებთან ან მომსახურების ხარისხის შემცირებასთან.
კმაყოფილების მაჩვენებლები თითქმის ყველა მომსახურების სფეროში გაიზარდა გარდა: მიწოდება/მიტანის სერვისებისა და სუპერმარკეტის, ჰიპერმარკეტის, მინიმარკეტის, მაღაზიებისა და მოლებისა. რაც ნიშნავს, რომ აღნიშნულმა სფერომ ვერ მოახერხა მომხმარებელთან ემოციური კავშირის დამყარება და გამოცდილების გაუმჯობესება“, - აღნიშნულია ACTR-ის კვლევაში.
გარდა ამისა, კვლევის ფარგლებში გამოვლინდა ის მომსახურებები, რომელიც მომხმარებელთა მოლოდინებს ყველაზე ნაკლებად აკმაყოფილებს. ასე მაგალითად, საქართველოს მოსახლეობა 2025 წელს ყველაზე ნაკლებად კმაყოფილი არის ჯანდაცვის სფეროში მიღებული მომსახურებით, კერძოდ ქულები ასე გამოყურება:
საავადმყოფოები, კლინიკები, ლაბორატორიები — 6.98 ქულა;
სადაზღვევო მომსახურება — 7.23 ქულა.
„აღნიშნული მიუთითებს, რომ ჯანდაცვის სფეროში მომსახურება საჭიროებს გაუმჯობესებას და მომხმარებელზე უფრო მეტად ორიენტირებულობას. გარდა ამისა, შედარებით დაბალი ქულებით ფასდება საზოგადოებრივი ტრანსპორტის მომსახურებით კმაყოფილება (7.62) და სუპერმარკეტებში, ჰიპერმარკეტებში, მინიმარკეტებში, მაღაზიებსა და მოლებში მიღებული მომსახურება (7.66)“, - ვკითხულობთ კვლევაში.
ცნობისთვის, ორგანიზაციამ გამოკითხვა ჩაატარა შემთხვევითი შერჩევის გზით, 804 ზრდასრულ მოსახლეს შორის, საქართველოს მასშტაბით. გამოკითხვა მიმდინარეობდა 2025 წლის 22-26 აპრილს. მონაცემთა სტატისტიკური ცდომილება, საშუალოდ, არ აღემატება 3.5%-ს. გამოყენებული მეთოდი – სატელეფონო გამოკითხვა.
