ნაციონალური საკალათბურთო ასოციაციის განვითარების ლიგაში მორიგი მატჩი ბეჟანიშვილის გუნდის სასარგებლოად დასრულდა

ნაციონალური საკალათბურთო ასოციაციის განვითარების ლიგაში, მორიგი ტურის მატჩები გაიმართა.

 

„გრანდ რაპიდს გოლდს“, რომელიც „დენვერ ნაგეტსის“ გუნდია და ქართველი კალათბურთელი გიორგი ბეჟანიშვილი თამაშობს, „მილუოკი ბაქსის“ G ლიგის გუნდს „ვისკონსინ ჰერდი“ შეხვდა, სადაც სანდრო მამუკელაშვილი თამაშობს. შეხვედრა ბეჟანიშვილის გუნდის სასარგებლოად დასრულდა 111-107.

 

გიორგი ბეჟანიშვილმა 18 წუთში 6 ქულა, 12 მოხსნა (5 შეტევაში) და 2 პასი მიითვალა. მან 9-დან 3 ორქულიანი ჩააგდო და 2 ერთქულიანი უშედეგოდ ისროლა. ბეჟანიშვილმა 3-ჯერ დაკარგა ბურთი და 5 პერსონალური ფოლი მიიღო.

 

სანდრო მამუკელაშვილმა 33 წუთში 15 ქულა, 7 მოხსნა (4 შეტევაში), 3 პასი, 1 ჩაჭრა და 2 დაფარება დააგროვა. მან 5-დან 1 სამქულიანი და 10-დან 6 ორქულიანი გამოიყენა, საჯარიმო კი 3-ჯერ ისროლა და უშედეგოდ. სანდრო მეტოქის წინააღმდეგ 4-ჯერ დაჯარიმდა.