ჯანდაცვის მსოფლიო ორგანიზაციის მონაცემებით Covid-19-ით ინფიცირების შემთხვევები მესამე კვირაა მცირდება, თუმცა, ამასთანავე, დადასტურებული შემთხვევების რაოდენობა ჯერ კიდევ ერთ-ერთ უმაღლეს ნიშნულზეა პანდემიის დაწყებიდან.
ამ კვირაში მთელ მსოფლიოში დაფიქსირდა ინფიცირების 4.8 მილიონი ახალი შემთხვევა და 86 ათასი გარდაცვალება - ამის შესახებ საუბარია ჯანმოს ყოველკვირეულ ეპიდემიოლოგიურ ანგარიშში, რომელიც 16 მაისამდე მონაცემებს მოიცავს.
წინა კვირასთან შედარებით, ინფიცირების ახალი შემთხვევები შემცირებულია 12%-ით. ევროპა ინფიცირების შემთხვევების მკვეთრი 26%-იანი შემცირების შესახებ იუწყება.
"ყველა რეგიონი ახალი შემთხვევების შემცირების შესახებ იუწყება გარდა წყნარი ოკეანის დასავლეთ ნაწილისა, სადაც ახალი შემთხვევები წინა კვირის შემთხვევების რაოდენობის ანალოგიური იყო," - ნათქვამია ჯანმოს ანგარიშში.
ბოლო კვირებში შემთხვევების შემცირება მას შემდეგ მოხდა, რაც აპრილში Covid-19-ის შემთხვევებმა რეკორდულ მაჩვენებელს მიაღწია. ამასთან Covid-19 განაგრძობს სწრაფ გავრცელებას ბევრ ქვეყანაში.
