ბრაკონიერობის შესამცირებლად, მონადირეებს სერტიფიცირების გავლა მოუწევთ, საერთაშორისო ორგანიზაციის (CIC) მიერ აღიარებული ნადირობის სერტიფიკატით - ამის შესახებ ველური ბუნების სააგენტოს ხელმძღვანელმა „ნადირობის შესახებ“ კანონპროექტის განხილვაზე განაცხადა.
უწყების მიერ გავრცელებული ინფორმაციის თანახმად, „ნადირობის შესახებ“ კანონის პროექტი ველური ბუნების ეროვნული სააგენტოს ინიციატივით, ქართველი და უცხოელი ექსპერტების მიერ მომზადდა.
კანონპროექტის მიზანია ნადირობის ეკონომიკური, სოციალური და ეკოლოგიური ფასეულობების თანაბრად გათვალისწინება და სანადირო სახეობებისა და მათი საბინადრო გარემოს მდგრადი მართვა, სახეობათა პოპულაციების კონტროლი, სოფლის მოსახლეობისთვის ახალი სამუშაო ადგილების შექმნა.
ველური ბუნების ეროვნული სააგენტოს უფროსმა, რევაზ ბეჟაშვილმა ახალი კანონპროექტის სამუშაო ვერსიის შესახებ პრეზენტაცია წარადგინა, რის შემდეგაც მონადირეებს შესაძლებლობა მიეცათ, დიალოგის რეჟიმში დაეფიქსირებინათ საკუთარი მოსაზრებები და წინადადებები.
„აღსანიშნავია, რომ ახალი რეგულაცია ითვალისწინებს მონადირეთა სერტიფიცირებას საერთაშორისო ორგანიზაციის (CIC) მიერ აღიარებული ნადირობის სერტიფიკატით, რაც ხელს შეუწყობს ბრაკონიერობის შემცირებასა და მოწყვლადი სახეობების დაცვას”, - განაცხადა რევაზ ბეჟაშვილმა.
ცნობისთვის, კანონი სოფლის მეურნეობის სამინისტროსა და შვედეთის სამეფოს მთავრობის საერთაშორისო განვითარების თანამშრომლობის სააგენტოს (Sida) პროექტის „გადავარჩინოთ ბუნება - საქართველო“ ფარგლებშია მომზადებული.
