პოლიციელი იქნება თუ რომელიმე უწყების სხვა წარმომადგენელი, ძალადობას, ასეთ მავნე ქმედებებს და მათაც, პოლიციელის მუნდირის შეურაცხყოფას არც მათ გავუტარებთ და არც მათ ვაპატიებთ, – ამის შესახებ ვიცე-პრემიერმა, სამართალდამცავი ორგანოების კოორდინაციის საკითხებში სახელმწიფო მინისტრმა, მამუკა მდინარაძემ ტელეკომპანია „იმედის“ გადაცემა „ღია ეთერში“ განაცხადა.
მამუკა მდინარაძის თქმით, პოლიციელი იქნება თუ სხვა ადამიანი, ვერავინ გაიტანს თავის დანაშაულს.
„ერთი რამ შემიძლია, დაბეჯითებით გითხრათ, ხვალაც შეიძლება, დანაშაული მოხდეს, 45 ათას ადამიანში ვიღაცამ შეიძლება, შეარცხვინოს კვლავ პოლიციელის მუნდირი, ამის გარანტიას ვერავინ მისცემს ვერავის. ვერც მე მივცემ მოსახლეობას გარანტიას, რომ ხვალ პოლიციელი რაღაც დანაშაულს არ ჩაიდენს, 45 ათასი ადამიანიდან რომელიმე, მაგრამ, გარანტიას მივცემთ იმისას, რომ დაუსჯელი ვერ დარჩება ვერცერთი. მე როდესაც ამ თანამდებობაზე გადავდიოდი, ახლა სადაც ვარ, პოლიციელები არ დასჯილან აქციების დროსო და ერთ-ერთ ეთერში ვთქვი, პირობა დავდე და რამდენიმე კვირაში, რამდენიმე დღეში თუ არა, ეს პირობა შესრულდა. ვისზეც კი შესაძლებელი იყო, მტკიცებულება მოგროვებულიყო ელემენტარული, ყველაზე მოგროვდა და ეს მუშაობა გრძელდება, არ დაგვისრულებია.
ყველას ვაფრთხილებ, პოლიციელი იქნება თუ სხვა ადამიანი, რომელიც პოლიციელის დისკრედიტაციას შეეცდება, ერთი მხრივ, პოლიციელის მუნდირის, ღირსების, გმირი ხალხის შეურაცხყოფას არავის არ გავუტარებთ და მანიპულაციებით მათი დისკრედიტაციის კამპანიას. გუშინ ვნახეთ, ცნობილი იყო მათთვის ჯერ თებერვალში, მერე პროკურატურის პიარსამსახურიდან, იცოდნენ, რომ დაკავებული იყვნენ ადამიანები და ანონსში ეს შეგნებულად არ ჩასვეს.
მეორე მხრივ, პოლიციელი იქნება თუ რომელიმე უწყების სხვა წარმომადგენელი, ძალადობას და ასეთ მავნე ქმედებებს, პოლიციელის მუნდირის შეურაცხყოფას არც მათ გავუტარებთ და ვაპატიებთ. ეს არის სწორი მიდგომა. მე მიკვირს იმ ხალხის, რომელიც საერთოდ არაფერს ამბობს, რომ, მაგალითად, დანიის, საფრანგეთის, დიდი ბრიტანეთის ფაქტები იყო, სადაც სცემენ ქუჩაში, კამერების წინ რომ ამას აკეთებენ, დღემდე ერთი ადამიანი არ არის დასჯილი. ის არავის აწუხებს. იმაზე არავინ საუბრობს, იქ „დემოკრატიულად“ სცემენ, როგორც ჩანს, ჩვენთან დასჯილია ადამიანი, ფაქტია სახეზე, გახსნილია ოთხი წლის შემდეგ საქმე და ცდილობენ, დაატრიალონ და სისტემურად წარმოაჩინონ ეს ამბავი. ვერც სისტემურობა იქნება, ვერც ძალადობა იქნება, იქიდან გამომდინარე, რომ პრევენციას ყოველთვის მოვახდენთ. რაღაცებს ვერ ვახერხებდით წლების განმავლობაში ისე, როგორც ეს დღეს შეგვიძლია. ვერავინ გაიტანს თავის დანაშაულს“, – განაცხადა მამუკა მდინარაძემ.
