თენგიზ ცერცვაძის სახელობის ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრი საზეიმოდ გაიხსნა. სამედიცინო ცენტრი დიღომში, ლუბლიანას ქუჩა N70 -ში განთავსდა.
საქართველოს ჯანდაცვის სამინისტროს ინფორმაციით, 11-სართულიანი შენობა თანამედროვე სტანდარტებით მოეწყო. კლინიკა ულტრათანამედროვე ლაბორატორიებით, პლეტიზმოგრაფის, კომპიუტერული ტომოგრაფიის, ექოსკოპიური, რენტგენოლოგიური სამედიცინო ტექნიკითაა აღჭურვილი, რომელსაც კვალიფიციური სამედიცინო პერსონალი ემსახურება.
უწყების ცნობით, სამომავლოდ იგეგმება უახლესი მაგნიტორეზონანსული ტექნიკით აღჭურვაც. ახალი ინფექციური საავადმყოფო 83 საწოლზეა გათვლილი. ახალ შენობაში კლინიკას გადაუდებელი ამბულატორიული განყოფილება დაემატა. პაციენტებს ადგილზე ყველა საჭირო-სავალდებულო კვლევების ჩატარების შესაძლებლობა აქვთ. საერთო ჯამში, კლინიკაში 352 თანამშრომელია დასაქმებული.
ცნობისთვის, თბილისის ინფექციური საავადმყოფოს ახალი შენობის სარემონტო სამუშაოებისთვის შესაბამისი ხელშეკრულება კონტრაქტორ კომპანია "ანაგთან" 2022 წლის მარტში გაფორმდა, ადგილზე სამუშაოები 2023 წლის 25 მაისს უნდა დასრულებულიყო. თუმცა კონტრაქტორმა კომპანიამ ვადების გახანგრძლივება ითხოვა. ჯანდაცვის მინისტრის, მიხეილ სარჯველაძის თქმით, ინფექციური საავადმყოფოს ახალი შენობის სარეაბილიტაციო სამუშაოები დაახლოებით 90 მლნ ლარი დაჯდა.
აღსანიშნავია, რომ კლინიკას სახელწოდება 2024 წელს გენერალური დირექტორის, პროფესორ თენგიზ ცერცვაძის გარდაცვალების შემდეგ შეეცვალა და მას თენგიზ ცერცვაძის სახელობის ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრის სახელი მიენიჭა.
თბილისის ინფექციური საავადმყოფო 1953 წელს დაარსდა. 1989 წელს თბილისის ინფექციურ საავადმყოფოში შეიქმნა შიდსის განყოფილება, რომლის ხელმძღვანელადაც თენგიზ ცერცვაძე დაინიშნა. 2001 წელს კლინიკას ეწოდა „ინფექციური პათოლოგიის, შიდსისა და კლინიკური იმუნოლოგიის სამეცნიერო-პრაქტიკული ცენტრი“, რომლის გენერალური დირექტორი გახდა თენგიზ ცერცვაძე. ის სიცოცხლის ბოლომდე ხელმძღვანელობდა დაწესებულებას.
თენგიზ ცერცვაძის სახელობის ინფექციური პათოლოგიის, შიდსისა და კლინიკური იმუნოლოგიის ცენტრის ახალი შენობის გახსნის ღონისძიებას ესწრებოდა საქართველოს პრემიერ-მინისტრი ირაკლი კობახიძეც.
