თბილისში, „ნამახვანჰესის“ მშენებლობის საწინააღმდეგო აქციის ერთ-ერთმა ორგანიზატორმა, ვარლამ გოლეთიანმა წინასწარ მოუხადა ბოდიში დედაქალაქის მოსახლეობას მოსალოდნელი დისკომფორტის გამო.
„ჩვენ ხვალ დავკეტავთ დედაქალაქს და დავანახვებთ მთელ მსოფლიოს, რომ ქართველები ვართ ერთიანი და შეუპოვარი ერი. თუ ჩვენ ძალისხმევას არ ექნება შედეგი, მოძრაობა გააერთიანებს ყველა პროტესტს, რასაც ადგილი აქვს მთელი ქვეყნის მასშტაბით. რეგიონებში გაფიცვებია, აქციებია... ჩვენ გავაერთიანებთ ყველაფერს, ჩვენ გავხდებით იმდენად ბევრნი, რომ ჩვენი ეს სიმრავლე შეარყევს ხელისუფლებას. ჩვენ არ გვინდა რევოლუცია. ეს ჩვენც დაგვაზიანებს. ჩვენ გონივრულად უნდა გადავდგათ ნაბიჯები, ხოლო მთავრობამ გადაწყვიტოს, არის თუ არა ხალხის ინტერესების გამტარი. თუ არა, მაშინ დატოვოს ხელისუფლება. ჩვენ ვერ დავუშვებთ, რომ ხალხის პროტესტი იყოს უგულებელყოფილი. ჩვენ ვერ დავუშვებთ იმას, რომ წლობით ვიდგეთ აქ, ხოლო მათ აკეთონ თავიანთი საქმე“, - განაცხადა ვარლამ გოლეთიანმა.
შეგახსენებთ, რომ საპროტესტო აქციის მონაწილეთა მოთხოვნები ასეთია:
გაწყდეს 2019 წ. 25 აპრილს ხელმოწერილი ხელშეკრულება საქართველოს მთავრობასა და კომპანია „ენკა რინიუებლზს“ შორის მდინარე რიონზე დაგეგმილი ნამახვანის ჰესების კასკადის მშენებლობის შესახებ და კომპანიამ დატოვოს რიონის ხეობა.
გაუქმდეს საქართველოს მთავრობის 2019 წლის 21 ნოემბრის #2405 განკარგულება "სახელმწიფო საკუთრებაში არსებული უძრავი ქონების შპს "ენკა რინიუებლზისათვის" აღნაგობის უფლებით გადაცემაზე თანხმობის მიცემისა და პირდაპირი მიყიდვის ფორმით პრივატიზების შესახებ".
გაუქმდეს ნამახვანის ჰესების კასკადზე 2015 წელს გაცემული სამშენებლო ნებართვა და ყველა სხვა მასზე დაფუძნებული დოკუმენტი.
თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა.
