ირაკლი ღარიბაშვილმა პრემიერ-მინისტრის თანამდებობა დატოვა.
ამის შესახებ ღარიბაშვილმა დღევანდელ ბრიფინგზე განაცხადა.
„მინდა, საზოგადოებას ვაცნობო გადაწყვეტილების შესახებ, რომელზეც ვიმსჯელეთ გუნდთან ერთად, დღეს მე ვტოვებ პრემიერ-მინისტრის თანამდებობას“, – აღნიშნა ღარიბაშვილმა.
ღარიბაშვილის თქმით, პოლიტსაბჭოსგან მიიღო შეთავაზება, დაიკავოს პარტიის თავმჯდომარის თანამდებობა და ამასთან დაკავშირებით ყრილობა გაიმართება პირველ თებერვალს.
შეგახსენებთ, ირაკლი ღარიბაშვილი პრემიერის თანამდებობას პირველად 2013-2015 წლებში იკავებდა. 2015 წლის 30 დეკემბერს მან თანამდებობა დატოვა და მთავრობაში 2019 წელს თავდაცვის მინისტრის რანგში დაბრუნდა. ორი წლის შემდეგ კი, 2021 წლის თებერვალში საქართველოს პარლამენტმა პრემიერ-მინისტრად დაამტკიცა.
