თბილისის ინფექციური საავადმყოფოს გენერალურმა დირექტორმა, „კოვიდ-19“-ის კლინიკური მართვის ხელმძღვანელმა, თენგიზ ცერცვაძემ საქართველოს პირველი არხის ეთერში განაცხადა, რომ ბოლომდე ვერ ვიტყვით, რომ „ომიკრონის“ ორმა შტამმა პანდემია დაასრულა, რადგან მსოფლიოში ყოველდღე ნახევარი მილიონი ახალი შემთხვევა ფიქსირდება.
„მათ შორის, საინტერესოა, რომ აშშ-სა და ევროპაში, გერმანიაში, მართვის თვალსაზრისით ერთ-ერთ საუკეთესო ქვეყანაში და ინგლისში; იმ ქვეყნებში, სადაც წინათ, ახალი შემთხვევები ყველაზე დაბალი იყო – სამხრეთ კორეა, ავსტრალია, ახალი ზელანდია, ჰონკონგი და ა.შ. იქ პიკი არ არის, მაგრამ შემთხვევები ჩვენზე ბევრად მაღალია. სიკვდილობა მე დავითვალე და უნიკალური შემთხვევა მოხდა, ბოლო ერთ თვეში სიკვდილობა გვაქვს ხუთჯერ და ათჯერ დაბალი, ვიდრე ევროპის დანარჩენ ქვეყნებს და აშშ-ს. ეს რას ამბობს?! – დიახ, იქმნება ილუზია, რომ პანდემია დავასრულეთ და ღმერთმა ქნას, ეს ილუზია არ იყოს, მაგრამ იქ ჯერ არ დასრულებულა“, – განაცხადა ცერცვაძემ.
თეგიზ ცერცვაძემ განაცხადა, რომ ახალი ტალღის საფრთხე არის.
„მით უმეტეს, „ომიკრონის“ ახალი შტამები ვლინდება. მათგან პანდემიური საფრთხის შემცველი შტამი ჯერ არ უნახავთ, მაგრამ როცა ყოველ კვირაში ახალი შტამის გამოჩენას არეპორტებენ, იქ არავინ იცის, ერთ-ერთი მათგანი შეიძლება, პანდემიური პოტენციალის გამოდგეს“, – განაცხადა თენგიზ ცერცვაძემ.
