Georgian Wings-ის საჰაერო ხომალდის დაშვებას, კიშინაუს საერთაშორისო აეროპორტი საზეიმო ვითარებაში ტრადიციულად წყლის თაღით დახვდა.
პირველი რეგულარული ფრენის ღონისძიება, კიშინაუს საერთაშორისო აეროპორტში საზეიმო ვითარებაში წარიმართა. მგზავრთა დახვედრა მოლდოვური ტრადიციების შესაბამისად მოხდა, ხოლო მოლდოვას რესპუბლიკაში საქართველოს საელჩოს ორგანიზებით, პირველი ფრენის რეგისტრაცია კიშინაუ-თბილისის მიმართულებით, ქართული ტრადიციული მუსიკისა და აქტივობების ფონზე მიმდინარეობდა.
ღონისძიებას, როგორც Georgian Wings-ის ხელმძღვანელი, ასევე მოლდოვას რესპუბლიკაში საქართველოს საგანგებო და სრულუფლებიანი ელჩი ლევან დიასამიძე, კიშინაუს საერთაშორისო აეროპორტის და Georgian Wings-ის პარტნიორი კომპანიების წარმომადგენლები ესწრებოდნენ. Georgian Wings-ის პრეზიდენტის, შალვა კიკნაძის განცხადებით, ავიაკომპანია Geosky-ს სამგზავრო მიმართულება Georgian Wings-ი იწყებს ახალ მიმართულებას თბილისი-კიშინაუ-თბილისი კვირაში ორი სიხშირით, გადაწყვეტილება იქნა მიღებული კიშინაუს მიმართულებით ფრენების დაწყების თაობაზე, გაზრდილი მოთხოვნიდან გამომდინარე, აღნიშნული ფრენა უფრო დააახლოებს საქართველოსა და მოლდოვას და ხელს შეუწყობს ორ ქვეყანას შორის ტურიზმის ზრდას“.
ღონისძიების დასრულების შემდგომ მხარეებს შორის შეხვედრა გაიმართა. მხარეებმა ხაზი გაუსვეს, აღნიშნული საჰაერო მიმოსვლის დანიშვნის მნიშვნელობას და ორ ქვეყანას შორის ურთიერთობების კიდევ უფრო გაღრმავებას.
„დღეს სასიხარულო დღე გვაქვს, პირველად დამოუკიდებელი საქართველოს ისტორიაში ქართულმა ავიაკომპანიამ, Georgian Wings-მა დაიწყო პირდაპირი რეისების განხორციელება კიშინაუს მიმართულებით. რეისები იქნება კვირაში ორჯერ და არის არაჩვეულებრივი შესაძლებლობა, ჩვენი კულტურა ჩვენი ქვეყანა უფრო ახლოს გავაცნოთ ჩვენს მოლდოველ მეგობრებს. საკმაოდ აქტიური ტურისტები არიან მოლდოველები, ამიტომ დიდი იმედი მაქვს ძალიან სწრაფად ერთ-ერთი საყვარელი მიმართულება გახდება საქართველო“, – განაცხადა ლევან დიასამიძემ.
Georgian Wings-ი დღეიდან ფრენებს თბილისი-კიშინაუ-თბილისის მიმართულებით ყოველ სამშაბათს და შაბათ დღეს, რეგულარულად კვირაში ორი სიხშირით შეასრულებს.
