დიდმა ბრიტანეთმა რუსეთის პატრიარქ კირილს სანქციები დაუწესა, ამის შესახებ გაერთიანებული სამეფოს საგარეო უწყების მიერ გავრცელებულ განცხადებაშია ნათქვამი.
სანქციები დაუწესდა რუსული სატვირთო კომპანიის, „ვოლგა-დნეპრის“ ხელმძღვანელ ალექსეი ისაიკინსაც და ასევე, რუსეთის 64-ე მოტომსროლელი ბრიგადის ოთხ პოლკოვნიკს, რომლებიც, გავრცელებული ინფორმაციით, მონაწილეობდნენ ბუჩაში მშვიდობიანი უკრაინელი მოსახლეობის მკვლელობაში.
ე.წ. შავ სიაში ბავშვთა უფლებების საკითხებში კომისარი მარია ლვოვა-ბელოვაც მოხვდა . ბრიტანეთის ახალი სანქციები იმ პირებს დაუწესდათ, ვინც უკრაინაში ბავშვების მიმართ ბარბაროსულ მოპყრობასთან არის დაკავშირებული.
საუბარია 2 ათასი უკრაინელი ბავშვის ქვეყნიდან იძულებით გადაყვანასა და გაშვილებაზე.
