დღეს თბილისსა და რეგიონებში აქცია „შინ ევროპისკენ“ გაიმართება. აქცია თბილისში, რუსთაველის გამზირზე პარლამენტის შენობის წინ, 20:00 საათზე დაიწყება.
აქცია „სირცხვილიას“ და სამოქალაქო მოძრაობების ორგანიზებით იმართება.
როგორც სოციალურ ქსელში ორგანიზატორების მიერ გავრცელებულ ინფორმაციაშია ნათქვამი, აქციაზე შეკრებილ მოქალაქეებს სიტყვით მიმართავენ სამოქალაქო საზოგადოების, უკრაინის ხელისუფლებისა და ევროკავშირის წარმომადგენლები.
21:00 საათზე, აქციის მონაწილეები მსვლელობით გაემართებიან ევროპის მოედნისკენ, სადაც ღონისძიების დასკვნითი ნაწილი გაიმართება.
„სირცხვილიას“ წევრი ნოდარ რუხაძე აცხადებს, რომ 20 ივნისს, 20:00 საათზე, ელოდებიან საქართველოს ყველა მოქალაქეს პარლამენტის წინ. მისი თქმით, ეს აქცია იქნება გადამწყვეტი მნიშვნელობის, რათა სტრატეგიულ პარტნიორებს კიდევ ერთხელ დავანახოთ ერთობა.
ასევე, როგორც მან აღნიშნა, ამ შეკრების მიზანია, „ევროპელმა პარტნიორებმა დაინახონ, რომ საქართველოს მოქალაქეებმა გააკეთეს ევროპული არჩევანი“.
შეგახსენებთ, თბილისის გარდა, 20 ივნისს ამავე მიზნით მოქალაქეთა შეკრებები საქართველოს სხვა ქალაქებშიც - 18:00 საათზე ზუგდიდში, 19:00 საათზე ბათუმში და 15:00 საათზე ქუთაისში გაიმართება.
ამასთან, მსგავსი შეკრებები ჩატარდება ევროპის ქალაქებშიც - ლონდონში, პრაღაში, ჰანოვერში, პარიზში, ბუდაპეშტში, ბერლინში, ჰამბურგში, შტუტგარტში, რეიკიავიკში, ათენსა და ბრიუსელში.
