ევროპარლამენტის რეზოლუციებმა წინა წლების განმავლობაში საერთოდ დაკარგა ფასი ქართველი საზოგადოებისთვის - სამწუხაროდ, სიცრუე ფართოდ არის გამჯდარი ოდიოზურ ევროპარლამენტარებში - არ შეიძლება რასა იუკნევიჩიენეს მსგავსი ადამიანები, რომელიც ვარშავის პაქტიდან გადმოვარდნილი ტიპაჟია, დღეს წარმოადგენდნენ ევროკავშირს,- ასე უპასუხა საქართველოს პრემიერმა ჟურნალისტის კითხვას, რომლის მიხედვითაც დღეს ევროპარლამენტმა „უცხოური გავლენის გამჭვირვალობის შესახებ“ კანონპროექტთან დაკავშირებით დებატები უნდა გამართოს.
მისივე განცხადებით, სიცრუე არის სიცრუე.
„შემიძლია ერთი რამ გითხრათ, რომ ევროპარლამენტის რეზოლუციებმა წინა წლების განმავლობაში, საერთოდ დაკარგა ფასი ქართველი საზოგადოებისთვის. გახსოვთ 3 რეზოლუცია, სადაც კეზერაშვილს საწყალ დევნილად აცხადებდნენ, ასევე სააკაშვილს და გვარამიას პოლიტპატიმრებად აცხადებდნენ, სადაც ითხოვდნენ ბიძინა ივანიშვილის დასჯას. ასეთ პირობებში, საზოგადოების თვალში, არავითარი ფასი აღარ აქვს ევროპარლამენტის რეზოლუციებს. სამწუხაროდ, სიცრუე ფართოდ არის გამჯდარი ოდიოზურ ევროპარლამენტარებში, რომლებიც საბოლოდ, აფერხებენ საკუთარი რეზოლუციების გატანას. ეს არის უკიდურესად არაევროპული მოვლენა და ძალიან დიდი იმედი მაქვს, რომ ახლო მომავალში ევროპა მოახერხებს და დაძლევს ასეთი ტიპის პრობლემებს, რომლებიც დღეს სამწუხაროდ სახეზეა.
ჩემთვის სიმართლეს აქვს ფასი. ფაქტებს და არგუმენტებს. როდესაც ვხედავთ სიცრუეს, მნიშვნელობა არ აქვს ეს ქართველი იქნება თუ უცხოელი, სიცრუე არის სიცრუე. როდესაც კეზერაშვილს საწყალ დევნილად გიცხადებენ, რა თქმა უნდა, ევროპარლამენტარის განცხადებას ასეთ პირობებში, ფასი ვერ ექნება. როდესაც საუბრობენ დებიძინიზაციაზე, რა თქმა უნდა, ამასაც ვერ ექნება ფასი. ეს უბრალოდ სამარცხვინოა. არ შეიძლება რასა იუკნევიჩიენე იყოს ევროპის სახე. რასა, რომელიც, არ ვიცი, ვარშავის ფაქტიდან გადმოვარდნილი ტიპაჟია. არ შეიძლება ასეთი ადამიანები დღეს წარმოადგენდნენ ევროკავშირს“, - განაცხადა კობახიძემ.
გარდა ამისა, პრემიერ-მინისტრმა პარტია „ახალის“ ერთ-ერთი დამფუძნებლის, ნიკა გვარამიას სტრასბურგში ვიზიტზე, ევროპარლამენტარებთან შეხვედრასა და მათ ერთობლივ ბრიფინგზეც ისაუბრა. მისი განცხადებით, „დღეს ევროპელი ოდიოზური პოლიტიკოსები, გათავხედებული არიან სწორედ იმის გამო, რომ სიცრუის ჩაკეტილი წრეა, რომელიც უნდა გაირღვეს“.
„ეს არის აბსოლუტურად სამარცხვინო განცხადება. პირდაპირ შეიძლება ითქვას ამისთვისაც არის გამჭვირვალობა საჭირო. რაც მეტი გამჭვირვალობა იქნება, მით უფრო ნაკლებად მოვისმენთ ასეთ სამარცხვინო განცხადებებს ევროპელი პოლიტიკოსების მხრიდან. დღეს ევროპელი პოლიტიკოსები, ასეთი ოდიოზური პოლიტიკოსები, გათავხედებული არიან სწორედ იმის გამო, რომ არის სიცრუის ჩაკეტილი წრე. ეს სიცრუის ჩაკეტილი წრე უნდა გაირღვეს და მათ შორის, სწორედ ამას ემსახურება გამჭვირვალობის კანონი, რომელიც აუცილებლად იქნება მიღებული სამი მოსმენით“, - განაცხადა კობახიძემ.
