ჩვენი ქვეყნის გაერთიანების გარეშე ჩვენი ქვეყანა ვერ იქნება ისეთი, როგორიც გვინდა, რომ იყოს, როგორიც წარმოგვიდგენია, ერთიანი, ძლიერი, განვითარებული, ევროპული ტიპის სახელმწიფო, – ამის შესახებ საქართველოს პრემიერ-მინისტრმა, ირაკლი ღარიბაშვილმა ქართული დიასპორის დღისადმი მიძღვნილ ფორუმზე სიტყვით გამოსვლისას განაცხადა.
მთავრობის მეთაურმა ისაუბრა, თუ რას აკეთებს ხელისუფლება ბოლო 10 წლის განმავლობაში.
„გუშინ ჩემს გამოსვლაში ჩამოვაყალიბე, ჩემი აზრით, ის ძირითადი მიზანი და ეროვნული იდეა, რომლის გარშემოც ჩვენ ყველანი უნდა გავერთიანდეთ: ეს არის ჩვენი ქვეყნის გაერთიანება. ჩვენი ქვეყნის გაერთიანების გარეშე ჩვენი ქვეყანა ვერ იქნება ისეთი, როგორიც გვინდა, რომ იყოს, როგორიც წარმოგვიდგენია, ერთიანი, ძლიერი, განვითარებული, ევროპული ტიპის სახელმწიფო. რას აკეთებს ხელისუფლება ბოლო ამ 10 წლის განმავლობაში: ჩვენმა ხელისუფლებამ გააკეთა მაქსიმუმი იმისთვის, რომ ქვეყანაში დღეს გვქონოდა მშვიდობიანი პერიოდი. ეს არის უწყვეტი მშვიდობიანი პერიოდი, უწყვეტი სტაბილური პერიოდი, რომელიც, სამწუხაროდ, საუბედუროდ, ჩვენ არ გვქონია მას შემდეგ, რაც აღვადგინეთ დამოუკიდებლობა. გვქონდა სამოქალაქო ომები, გვქონდა ომი აფხაზეთში, ოსეთში, დავკარგეთ დროებით ტერიტორიული კონტროლი ჩვენს ძირძველ ისტორიულ ტერიტორიებზე და ბოლოს ისიც მოვახერხეთ, რომ მსოფლიოში ნომერ პირველ ბირთვულ სახელმწიფოსთან პირდაპირ კონფლიქტში შევედით, ვერ ავირიდეთ მათგან წამოსული პროვოკაციები და გვქონდა პირდაპირი ომი.
ახლა მინდა, კიდევ ერთხელ გავახსენო, მათ შორის, ჩვენს ოპონენტებს, ბოლო ამ 30 წელიწადს ჩვენ თუ გადავხედავთ, ყველა მმართველობის დროს ქვეყანაში იყო დესტაბილიზაცია, კონფლიქტები, ომები და ტერიტორიების დაკარგვა. გადახედეთ ჩვენ მიერ მართულ პერიოდს, მას შემდეგ, რაც მოვიდა ხელისუფლებაში ბიძინა ივანიშვილი და „ქართული ოცნება“, საქართველოს არ დაუკარგავს არცერთი გოჯი მიწა, საქართველოს არ ჰქონია არც ომი, არც კონფლიქტი, არც არავითარი რაიმე დაძაბულობა. ჩვენ მოვახერხეთ მშვიდობის შენარჩუნება, განმტკიცება და სტაბილურობის შექმნა, რაც მთავარი ფუნდამენტია. რომელი დიასპორის წარმომადგენელი ჩამოხვიდოდით, აქ რომ ყოფილიყო ომი, უბედურება, რომელი დიასპორის წარმომადგენელი იფიქრებდა იმაზე, რომ საქართველოში დაბრუნდეს, დაიწყოს წარმოება, ბიზნესი განავითაროს და ა.შ. ეს ხომ წარმოუდგენელი იქნებოდა. ვფიქრობ, ეს არის ის მყარი ფუნდამენტი, რომელიც შევქმენით ყველასთვის, ქვეყნის შიგნით მცხოვრები ჩვენი თანამოქალაქეებისთვის თუ საზღვრებს გარეთ მცხოვრები დიასპორისთვის. მთავარი არის მშვიდობა და სტაბილურობა“, – განაცხადა პრემიერმა.
მისი თქმით, დღეს არის ურთულესი პერიოდი, ურთულესი გეოპოლიტიკური ვითარება მთელ მსოფლიოში.
„მსოფლიო დგას, ყოველგვარი გადაჭარბების გარეშე, ბირთვული ომის საფრთხის წინაშე. ეს არ არის ვიღაცის მოგონილი, მოუსმინეთ ბირთვული სახელმწიფოების ლიდერებს და მათ რიტორიკას, მათ მუქარებს. დაბრუნდა ბირთვული ომის რიტორიკა, რაც არის ძალიან საშიში. ასეთ ვითარებაში, მინდა, ყველას გკითხოთ და გავხსნა დისკუსია, პატარა ქვეყნის, მაგრამ ძალიან ამაყი ქვეყნის და ამაყი ქართველი ხალხის მთავრობამ, ხელისუფლებამ, როგორ უნდა იმოქმედოს? ჩვენი პირდაპირი მოვალეობა და პირდაპირი პასუხისმგებლობაა, რომ, პირველ რიგში, ვიფიქროთ ჩვენი ქვეყნის გადარჩენაზე და ჩვენი მოქალაქეების დაცვაზე, უსაფრთხოებაზე. ამას, ვფიქრობ, ძალიან წარმატებით ვახერხებთ და ჩვენ ამ ვალდებულების შესრულებას გავაგრძელებთ და ქვეყანას გავიყვანთ სამშვიდობოზე. ეს ასე იქნება. არავის არ მივცემთ საშუალებას, რომ ქვეყანაში შემოიტანოს შფოთი, არეულობა, დესტაბილიზაცია. ძალიან ბევრი მცდელობა იყო, ყველამ ყველაფერი ძალიან კარგად ვიცით, მაგრამ ქვეყანამ და ჩვენმა ხელისუფლებამ, ჩვენმა გუნდმა მოახერხა ის, რომ თავიდან ავარიდეთ ჩვენს ქვეყანას ამ დიდ დამანგრეველ ომში და კონფლიქტში ჩართვა“, – განაცხადა პრემიერმა.
