უკრაინის სახელმწიფო ბირთვული კომპანიის განცხადებით, ჩერნობილის ატომურ ელექტროსადგურს ელექტროენერგიის მიწოდება შეუწყდა და არსებობს საფრთხე იმისა, რომ რადიაქტიური ნივთიერებების გამოყოფა მოხდეს.
მათივე განმარტებით, დახარჯული ბირთვული საწვავის გაგრილება შეუძლებელია.
ტელეგრამის არხზე გამოქვეყნებულ შეტყობინებაში, Energoatom-ი (უკრაინის ატომური ენერგიის მაგენერირებელი ეროვნული კომპანია) აცხადებს, რომ მაღალი ძაბვის ხაზი, რომელიც კვებავს ქარხანას, გათიშულია, მას შემდეგ, რაც რუსები ორი კვირის წინ ამ ტერიტორიაზე შეიჭრნენ.
ქვეყნის საგარეო საქმეთა მინისტრმა დმიტრო კულებამ, მოუწოდა საერთაშორისო საზოგადოებას სასწრაფოდ მოსთხოვოს რუსეთს, რომ ნება დართოს უკრაინულ მხარის დანაყოფებს განაახლონ ელექტრომომარაგება ჩერნობილის ატომურ ელექტროსადგურზე.
„დაზიანებულია ერთიანი ელექტრო ქსელი, რომელიც კვებავს ჩერნობილის ატომურ ელექტროსადგურს და მის ყველა ატომურ ობიექტს, რომელიც დაიპყრო რუსეთის არმიამ. ჩერნობილის ატომურმა ელექტროსადგურმა დაკარგა ელექტროენერგიის მიწოდება. მოვუწოდებ საერთაშორისო საზოგადოებას, სასწრაფოდ მოსთხოვოს რუსეთს ცეცხლის შეწყვეტა და მიეცით საშუალება სარემონტო განყოფილებებს განაახლონ ელექტრომომარაგება“, - დაწერა კულებამ Twitter-ზე.
უკრაინამ ატომური ენერგიის საერთაშორისო სააგენტოს აცნობა ჩერნობილის ატომურ ელექტორსადგურზე ელექტროენერგიის გათიშვასთან დაკავშირებით. IAEA-ს გენერალური დირექტორის თქმით, აღნიშნული არღვევს უსაფრთხოების ძირითად საყრდენს ელექტროენერგიის უწყვეტი მიწოდების უზრუნველსაყოფად.
სააგენტო Twitter-ზე გავრცელებულ განცხადებაში აღნიშნავს, რომ ამ მომენტისთვის მას უსაფრთხოებაზე კრიტიკული გავლენა არ აქვს.
