ჯანდაცვის მინისტრი ეკატერინე ტიკარაძე არ გამორიცხავს, რომ საქართველოში კორონავირუსის წინააღმდეგ ვაქცინაცია გარკვეული სეგმენტისთვის სავალდებულო პრაქტიკად დაინერგოს.
ამის შესახებ მინისტრმა ჟურნალისტებს განუცხადა. თუმცა, როგორც მან აღნიშნა, ჯერჯერობით სავალდებულო ვაქცინაციაზე არ მსჯელობენ.
„ამ ეტაპზე სავალდებულო ვაქცინაციაზე ჩვენ არ ვმსჯელობთ. თუმცა, შეიძლება დადგეს მომენტი, როდესაც ვაქცინაცია გარკვეული სეგმენტის წარმომადგენლებისთვის, როგორც სხვა ქვეყნებში, ასევე ჩვენთანაც დადგეს პრაქტიკად. მაგრამ დარწმუნებული ვარ, შეიძლება ავირიდოთ მსგავსი მოთხოვნები და დავალებები სახელმწიფოს მხრიდან“, - განაცხადა ტიკარაძემ.
ამასთან, მინისტრმა ბავშვებში ვირუსის მიმდინარეობის შესახებაც ისაუბრა და აღნიშნა, რომ კორონავირუსით ბავშვების ინფიცირება სულ უფრო და უფრო ნაკლებია.
„ბავშვების ტალღა ჩვენ თითქმის გადავიარეთ, რადგან გაცილებით უფრო მძიმე პაციენტები გვყავდა, დაახლოებით, 2 კვირის წინ. შესაბამისად, ჩვენ მობილიზაცია გავუკეთეთ ბავშვთა საწოლების მაქსიმალურ რაოდენობას. დღესდღეობით ძალიან კარგია, რომ სულ უფრო და უფრო ნაკლებია ბავშვებში ინფიცირება. ჩვენ ამას ალბათ ვირუსის თვისებას არ დავაბრალებთ, დავაბრალებთ უფრო მეტად იმას, რომ მშობლებიც, გამომდინარე იქედან, რომ დაინახეს რამდენად აგრესიულია ვირუსი ბავშვებთან მიმართებაში, გაცილებით უფრო ფრთხილები გახდნენ და იცავენ იმ რეკომენდაციებს, რომელიც გაცემულია სახელმწიფოს მხრიდან“, - განაცხადა ტიკარაძემ.
