1-ელი აპრილიდან ამოქმედდება ჯარიმები პიროტექნიკური ნაწარმის გამოყენების წესების დარღვევაზე. უფრო კონკრეტულად, პიროტექნიკური ნაწარმის იმ პირისთვის მიყიდვა, რომელსაც, არ აქვს მისი ფლობის ან/და გამოყენების უფლება, გამოიწვევს პირის დაჯარიმებას 2 000 ლარის ოდენობით. ამასთან, პიროტექნიკური ნაწარმის შეძენა იმ პირის მიერ, რომელსაც არ აქვს უფლება გამოიწვევს ამ პირის 1000 ლარით დაჯარიმებას. გარდა ამისა, პიროტექნიკური ნაწარმის საქართველოს კანონმდებლობით დადგენილი წესების დარღვევით გამოყენება – გამოიწვევს პირის დაჯარიმებას 2 000 ლარის ოდენობით.
შეგახსენებთ, რომ პროევროპულ აქციებზე, დემონსტრანტების მიერ პიროტექნიკის გამოყენების საპასუხოდ ხელისუფლებამ წინასაახალწლოდ ის მაღაზიები დალუქა, რომლებიც პროდუქტს ყიდდნენ, ხოლო შემდეგ ახალი რეგულაციები შემოიღო. დარეგულირდა პიროტექნიკის გამოყენება მანიფესტაციის დროს. მიმდინარე წლის 1-ელი თებერვლიდან კი პიროტექნიკის იმპორტის/ექსპორტის და რეალიზაციის მიმართულებით ამოქმედდა ახალი რეგულაცია, რაც გულისხმობს, რომ ეს ყველაფერი მხოლოდ სპეციალური ნებართვა/ლიცენზიის საფუძველზე იქნება დასაშვები.
