საქართველოს ფინანსთა სამინისტროს საგამოძიებო სამსახური აცხადებს ანაზღაურებადი სტაჟირების პროგრამას საგამოძიებო და ოპერატიული მიმართულებებით. ინფორმაციას ფინანსთა სამინისტროს საგამოძიებო სამსახურის პრესსამსახური ავრცელებს.
მათივე ცნობით, სტაჟირების პროგრამაში მონაწილეობის შესაძლებლობა ეძლევათ უმაღლესი იურიდიული, ეკონომიკური, ბიზნესის ადმინისტრირების, საჯარო ადმინისტრირების, სახელმწიფო მმართველობის, სოციალურ და პოლიტიკურ მეცნიერებათა ფაკულტეტების კურსდამთავრებულებს. სტაჟიორთა მიღება ხორციელდება გამომძიებლისა და ინსპექტორ-გამომძიებლის 30 ვაკანტურ პოზიციაზე.
„სტაჟირების კონკურსში მონაწილეობის მსურველთა ელექტრონული განაცხადები მიიღება საგამოძიებო სამსახურის ოფიციალურ ვებგვერდზე http://is.ge/ka-ge/stajireba 23 ოქტომბრიდან 13 ნოემბრის ჩათვლით.
სტაჟირების პროგრამის პოპულარიზაციის მიზნით, მიმდინარე წლის აპრილი-მაისის თვეში საგამოძიებო სამსახურის ხელმძღვანელმა პირებმა საქართველოს წამყვანი უმაღლესი სასწავლებლების სტუდენტებთან გაცნობითი ხასიათის შეხვედრები გამართეს. აღნიშნულ პროგრამაში ჩართული იყო ივ. ჯავახიშვილის სახელობის თბილისის სახელმწიფო უნივერსიტეტი, საქართველოს ტექნიკური უნივერსიტეტი, გორის, ქუთაისის, ბათუმის, ზუგდიდის, ახალციხისა და თელავის სახელმწიფო უნივერსიტეტები, ასევე, ქუთაისის საერთაშორისო უნივერსიტეტი და კავკასიის უნივერსიტეტი. გაცნობითი ხასიათის შეხვედრებზე საუბარი შეეხო საგამოძიებო სამსახურის საქმიანობის მიზნებს, ამოცანებს, საფინანსო-ეკონომიკური დანაშაულის წინააღმდეგ ბრძოლის სპეციფიკას. უწყების ხელმძღვანელი პირები ახალგაზრდებს ესაუბრნენ, თუ რა მნიშვნელობა ენიჭება სტაჟირების პროგრამას სტაჟიორთა პროფესიული ცოდნის მიღებაში, კვალიფიკაციის ამაღლებასა და დასაქმების პერსპექტივაში.
სტაჟირების შერჩევითი კონკურსის წარმატებით დასრულების შემდეგ სტაჟიორები თეორიული და პრაქტიკული სწავლების ექვსთვიან კურსს გაივლიან სსიპ ფინანსთა სამინისტროს აკადემიაში, საგამოძიებო სამსახურის საგამოძიებო დეპარტამენტის თბილისისა და რეგიონულ ქვედანაყოფებში. სტაჟიორები გაეცნობიან საგამოძიებო უწყების საქმიანობის ძირითად ამოცანებს, სამუშაოს სპეციფიკას და ჩაერთვებიან პრაქტიკულ ღონისძიებებში. სტაჟირების პროგრამის ფარგლებში, მოტივირებული ახალგაზრდების მოზიდვა და დასაქმება გაზრდის საგამოძიებო სამსახურის საქმიანობის ეფექტურობას, ხელს შეუწყობს ახალგაზრდების კარიერულ ზრდას“, – აღნიშნულია ფინანსთა სამინისტროს საგამოძიებო სამსახურის ინფორმაციაში.
