საბანკო სექტორში განთავსებული დეპოზიტების (ბანკთაშორისი დეპოზიტების გარდა) მოცულობამ 2025 წლის თებერვლის ბოლოსათვის 57.979 მლრდ ლარი შეადგინა, რაც 978.1 მლნ ლარით, 5.7%-ით მეტია წინა თვის ბოლოს არსებულ მაჩვენებელზე. საქართველოს ეროვნული ბანკის სტატისტიკის მიხედვით, 2025 წლის იანვარში ბანკებში სულ 58.957 მლრდ ლარის ანაბრები იყო განთავსებული.
ამავე სტატისტიკის მიხედვით, ყველაზე მეტი კლება უცხოურ ვალუტაში განთავსებულ დეპოზიტებს შეეხო, რაც სავარაუდოდ, თებერვალში იანვართან შედარებით ლარის გაცვლითი კურსის გამყარების ეფექტია.
კერძოდ, სებ-ის სტატისტიკით თებერვალში უცხოურ ვალუტაში განთავსებული იყო 30.788 მლრდ ლარის დეპოზიტები, მაშინ, როცა იანვარში ეს მაჩვენებელი 31.465 მლრდ ლარს შეადგენდა. რაც შეეხება ეროვნულ ვალუტაში განთავსებულ დეპოზიტებს, იანვარში 27.492 მლრდ ლარი იყო, თებერვალში კი 27.190 მლრდ ლარი.
დეპოზიტების ლარიზაციის კოეფიციენტმა 2025 წლის თებერვლის ბოლოსათვის 46.90 პროცენტი შეადგინა. წინა თვის ბოლო მდგომარეობასთან შედარებით, დეპოზიტების ლარიზაცია გაიზარდა 0.27 პროცენტული პუნქტით.
საქართველოს ეროვნული ბანკის ინტერაქტიული სტატისტიკის მიხედვით, თებერვალში ვადიან დეპოზიტებზე საშუალო წლიურმა შეწონილმა საბაზრო საპროცენტო განაკვეთმა 6.11% შეადგინა. მათ შორის ეროვნული ვალუტით განთავსებულ დეპოზიტებზე 7.81% , ხოლო უცხოური ვალუტით განთავსებულ დეპოზიტებზე 1.96%.
უცხოური ვალუტით განთავსებულ დეპოზიტებში აშშ დოლარის წილმა 42.5% , ხოლო ევროს წილმა 9.95% შეადგინა.
