![](/images/erovnuli-banki.jpg)
საქართველოს ეროვნულმა ბანკმა ანგარიშში სავალუტო ბაზარზე არსებული ვითარება მიმოიხილა. ეროვნული ბანკის ინფორმაციით, აპრილში, წინა თვესთან შედარებით, ლარის საშუალო გაცვლითი კურსი აშშ დოლარის მიმართ 2.6818-დან 2.6775-მდე, ანუ 0.16%-ით, ხოლო ევროს მიმართ – 2.9123-დან 2.8724-მდე, ანუ 1.37%-ით გამყარდა.
თვის ბოლოს ლარის ოფიციალურმა გაცვლითმა კურსმა აშშ დოლარისა და ევროს მიმართ 2.6835 და 2.8762 შეადგინა. აპრილში ლარი/დოლარის გაცვლითი კურსის მაქსიმალური მნიშვნელობა 2.6953 იყო, მინიმალური კი – 2.6699.
„აპრილში, საშუალო კურსთან შედარებით, გაცვლითი კურსის მინიმალური და მაქსიმალური მნიშვნელობები დაახლოებით თანაბრად იყო გადახრილი. აპრილში, საშუალოდ, დოლართან მიმართებაში შესამჩნევია დრამისა და ლარის გამყარება, გაუფასურებას განაგრძობს თურქული ლირა; ასევე გაუფასურდა ევროც და რუბლიც, ხოლო აზერბაიჯანული მანათი პრაქტიკულად არ შეცვლილა. ლარის რეალური ეფექტური გაცვლითი კურსი წლიურად 3.3%-ით გაუფასურდა, თუმცა თვის ჭრილში 0.2%-ით გამყარდა. რაც შეეხება ნომინალური ეფექტური გაცვლითი კურსის ინდექსს, წლიური გამყარება 7.8%-ია, თვის ჭრილში კი – 0.8%. ეფექტური კურსის გაუფასურება ქვეყნის კონკურენტუნარიანობაზე დადებითად აისახება, თუმცა იმპორტირებულ ინფლაციაზე ზრდის წნეხს ქმნის. სავაჭრო პარტნიორთაგან აპრილში წლიური ინფლაცია თურქეთში, რუსეთში, ბელარუსში, აშშ-ში, უკრაინასა და ევროზონაში საქართველოზე მაღალი იყო, ხოლო აზერბაიჯანსა და სომხეთში – დაბალი. ძირითადი სავაჭრო პარტნიორი ქვეყნებიდან ნაწილში ინფლაციის კლების ტენდენცია შეინიშნება, თუმცა მთლიანობაში ფასების დონე ჯერ ისევ მაღალ დონეზე ნარჩუნდება“, – აღნიშნულია საქართველოს ეროვნული ბანკის ანგარიშში.