რუსეთის ვიცეპრემიერ ალექსანდრ ნოვაკმა მხარი დაუჭირა ენერგეტიკის სამინისტროს წინადადებას ბენზინის ექსპორტის სრული აკრძალვის სექტემბრის ბოლომდე გაგრძელებას. მეტიც, ამ ვადამდე აკრძალვა მწარმოებლებზე გაგრძელდება, ხოლო ნავთობპროდუქტების არამწარმოებლებისთვის ოქტომბრის ბოლომდე გაგრძელდება.
ამის შესახებ ფედერაციის მთავრობის განცხადებაში წერია, რასაც Reuters ავრცელებს.
ამჟამად სრული აკრძალვა აგვისტოს ბოლომდე არის ძალაში, თუმცა Reuters -ის წყაროები მანამდეც არ გამორიცხავდნენ, რომ საჭიროების შემთხვევაში ის გახანგრძლივდებოდა.
წყაროები, ასევე, ამბობენ, რომ ექსპორტის აკრძალვის მიუხედავად, ბენზინის დეფიციტის საფრთხე კვლავ რეალურია, რადგან ექსპორტირებული კომერციული ბენზინის მოცულობა შიდა ბაზარზე ჭარბი მიწოდების შესაქმნელად მეტად მცირეა.
რუსეთში საწვავის ბაზარზე ფასების ზრდა წლის დასაწყისიდან დაიწყო, აპრილში კი მკვეთრად მოიმატა და 50%-ით ისტორიულ მაქსიმუმამდე გაიზარდა, მაშინ, როცა ბენზინის მარაგი კრიტიკულ ზღვარზეა.
17 ივლისს ენერგეტიკის მინისტრ სერგეი ცივილევმა განაცხადა, რომ სანქციების გამო რუსეთის ნავთობკომპანიები გადამამუშავებელი ქარხნების შეკეთებასთან დაკავშირებით პრობლემებს განიცდიან. მისი თქმით, ნავთობგადამამუშავებელ ქარხნებში მომხდარი „ჩავარდნები“ აღჭურვილობის მიწოდების პრობლემებს აწყდება. ეს მიწოდება 2022 წლის თებერვალში, ანუ უკრაინაში შეჭრის პირველი პაკეტის ფარგლებში ევროპული სანქციების ქვეშ მოექცა. ასევე, სასანქციო შეზღუდვების გამო ნავთობგადამამუშავებელი ქარხნების შეკეთების ვადები ხანგრძლივდება და მთავრობა იძულებულია, ამ ცვლილებების კომპენსირება მოახდინოს.
ამჟამად, „როსსტატის“ მონაცემებით, ბენზინგასამართ სადგურებზე ფასები, გასულ წელთან შედარებით, 11%-ით მაღალია, მაშინ, როცა სამომხმარებლო ფასთა საერთო ინდექსი 8.2%-ით იზრდება. აგვისტოს დასაწყისიდან ბირჟაზე საწვავის ფასები 7%-ით, ზაფხულის დასაწყისიდან 32%-ით, ხოლო წლის დასაწყისიდან 47%-ით გაიზარდა.
ფასების ზრდის მთავარი ფაქტორი ნავთობგადამამუშავებელ ქარხნებში მომხდარი ინციდენტებია. კერძოდ, აგვისტოს დასაწყისიდან ხუთი მსხვილი ნავთობგადამამუშავებელი ქარხანა უკრაინული დრონებით დაიბომბა და მათგან სამმა მთლიანად ან ნაწილობრივ შეწყვიტა წარმოება.
Reuters-ის ცნობით, გასულ წელს რუსეთის ქარხნებში ნავთობის გადამუშავების მოცულობა 12-წლიან მინიმუმამდე, ანუ 267 მლნ ტონამდე მას შემდეგ დაეცა, რაც უკრაინული დრონების დარტყმების სერიამ, მინიმუმ, 10 უდიდესი ქარხანა დააზიანა. მათგან ზოგიერთი თვეების განმავლობაში უმოქმედოდ დარჩა.
ცნობისთვის, რუსეთის მთავრობამ ბენზინის ექსპორტზე შეზღუდვები 2024 წლის 1-ლი მარტიდან დააწესა. გამონაკლისი სამთავრობათაშორისო, მათ შორის, ევრაზიის ეკონომიკური კავშირის ქვეყნებთან შეთანხმებებს, ასევე, მოქალაქეების მიერ პირადი მოხმარებისთვის ექსპორტირებული საწვავისა და საერთაშორისო ჰუმანიტარული დახმარებისთვის განკუთვნილი საავტომობილო ბენზინის მიწოდებას ეხებოდა. ემბარგო 20 მაისიდან 2024 წლის ივლისის ბოლომდე დროებით შეჩერდა, ხოლო 2024 წლის დეკემბრიდან საავტომობილო საწვავის ექსპორტის უფლება მხოლოდ მწარმოებლებს მიეცათ.
