უკრაინის პრეზიდენტი, ვოლოდიმირ ზელენსკი საღამოს ვიდეომიმართვაში რუსეთის მიერ ანექსირებულ ყირიმში რუსული აეროდრომის აფეთქებას ეხმაურება.
ზელენსკი ამბობს, რომ რუსეთმა ნახევარკუნძული, რომელიც ყოველთვის იყო და იქნება ევროპის ერთ-ერთი საუკეთესო ადგილი, ერთ-ერთ ყველაზე საშიშ ტერიტორიად აქცია, მაგრამ, მისი თქმით, უკრაინა ყველაფერს დაიბრუნებს.
"რუსეთის ეს ომი უკრაინისა და მთელი თავისუფალი ევროპის წინააღმდეგ ყირიმით დაიწყო და უნდა დასრულდეს ყირიმით - მისი გათავისუფლებით.
რუსეთმა ჩვენი ნახევარკუნძული, რომელიც ყოველთვის იყო და იქნება ევროპის ერთ-ერთი საუკეთესო ადგილი, ერთ-ერთ ყველაზე საშიშ ადგილად აქცია. მაგრამ ჩვენ დავუბრუნდებით უკრაინულ ყირიმს.
ხარკოვის ოლქიდან ხერსონამდე, დონეცკიდან ენერგოდარამდე, ლუგანსკიდან იალტამდე, ბერდიანსკიდან ნოვოფედორივკამდე - ეს ყველაფერი ჩვენი ქვეყნის ნაწილებია, ეს ყველაფერი უკრაინაა, რომელიც სრულიად თავისუფალი იქნება" - ამბობს ზელენსკი.
ცნობისთვის, დღეს აფეთქება იყო ყირიმში, ნოვოფედოროვკაში. აფეთქებებთან დაკავშირებით, რუსეთის თავდაცვის სამინისტრო ამტკიცებს, რომ თავდასხმას ადგილი არ ჰქონია და მხოლოდ საავიაციო საბრძოლო მასალა აფეთქდა, დაშავდა 9 ადამიანი. პარალელურად, ვრცელდება ინფორმაცია რომ იერიშები ავიადრომზე, 300 კილომეტრის რადიუსზე მოქმედი "ჰაიმარსის" სარაკეტო სისტემიდან მიიტანეს.
