აშშ-თან მოლაპარაკების პროცესში, რუსეთი აყენებს პირობას, უკრაინა არ მიიღონ ნატოში, მეტიც, ალიანსმა უარი თქვას 2008 წელს ბუქარესტში გაკეთებულ პირობაზე, რომ უკრაინა ალიანსის წევრი ქვეყანა გახდება.
ამის შესახებ რუსეთის საგარეო საქმეთა სამინისტროს პრესსპიკერმა, მარია ზახაროვამ 18 თებერვლის ბრიფინგზე, „როიტერსის“ კორესპონდენტის პასუხად ისაუბრა.
„უკრაინის ნატოში გაწევრება ჩვენთვის მიუღებელია. ეს ქმნის სერიოზულ საფრთხეს ჩვენი უსაფრთხოების თვალსაზრისით და საერთოდ, კატასტროფულ შედეგებს მოიტანს მთელი ევროპისთვის. ამასთან, უნდა აღინიშნოს, რომ საკმარისი არ არის უარი კიევის ნატოში მიღებაზე. ალიანსმა უკან უნდა წაიღოს 2008 წლის ბუქარესტის სამიტის დაპირება, რომლის მიხედვითაც, უკრაინა მომავალში გარანტირებულად შევიდოდა ჩრდილოატლანტიკურ ალიანსში. წინააღმდეგ შემთხვევაში, ეს პრობლემა კვლავაც მოწამლავს ატმოსფეროს ევროპის კონტინენტზე“, — განაცხადა მარია ზახაროვამ.
