როგორც „ცივი ომის“ წლებში, ჩვენ კვლავ მივუახლოვდით საშიშ და, შესაძლოა, კიდევ უფრო საშიშ ზღვარს, – ამის შესახებ გაერო-ს უშიშროების საბჭოს სხდომაზე სიტყვით გამოსვლისას რუსეთის საგარეო საქმეთა მინისტრმა, სერგეი ლავროვმა განაცხადა. ლავროვი საბჭოს სხდომას თავმჯდომარეობდა, რადგან რუსეთმა აპრილში უშიშროების საბჭოს თავმჯდომარეობა როტაციის პრინციპით ერთი თვით გადაიბარა.
„როგორც ცივი ომის წლებში, ჩვენ კვლავ მივუახლოვდით საშიშ და, შესაძლოა, კიდევ უფრო საშიშ ზღვარს. სიტუაცია უარესდება მილტილატერალიზმში რწმენის დაკარგვით, როდესაც დასავლეთის ფინანსური და ეკონომიკური აგრესია ანადგურებს გლობალიზაციის სარგებელს, როდესაც აშშ და მისი მოკავშირეები უარს ამბობენ დიპლომატიაზე და ურთიერთობების გარკვევას ბრძოლის ველზე ითხოვენ“, – განაცხადა სერგეი ლავროვმა.
ლავროვის განცხადებით, არავის მიუცია დასავლური უმცირესობისთვის უფლება, ისაუბროს მთელი კაცობრიობის სახელით.
