პუტინის რეიტინგი აგვისტოს დასაწყისში შესამჩნევად შემცირდა. ამის შესახებ სოციოლოგიური კვლევის რუსული ორგანიზაცია “საზოგადოებრივი აზრის ფონდის” გამოკითხვის შედეგებში წერია, რასაც The Moscow Times ავრცელებს.
კერძოდ, 3 აგვისტოს მონაცემებით, 77%-მდე დაეცა იმ რუსების წილი, რომლებიც პუტინის საქმიანობას დადებითად აფასებენ, რაც 2023 წლის ნოემბრის შემდეგ ყველაზე დაბალი მაჩვენებელია.
ერთ კვირაში პუტინის რეიტინგმა 4 პუნქტი დაკარგა, ხოლო ივნისის ბოლოს დაფიქსირებულ პიკთან შედარებით 6 პუნქტით დაეცა. ამჟამად პუტინის რეიტინგი იმაზე დაბალია, ვიდრე ერთი წლის წინ, კურსკის ოლქში უკრაინის შეიარაღებული ძალების შეჭრის დროს იყო.
ასევე, 77%-მდე დაეცა პუტინის ნდობის რეიტინგიც, რაც 2024 წლის ოქტომბრის შემდეგ ყველაზე დაბალი მაჩვენებელია. ამასთან, მის მიმართ უნდობლობით განწყობილი რუსების წილი 14%-მდე გაიზარდა, რაც 20 თვეზე მეტი ხნის განმავლობაში ყველაზე მაღალი მაჩვენებელია.
პარალელურად, მთავრობის მოწონების რეიტინგი მარტში 60%-დან 51%-მდე, ხოლო მმართველი პარტია „ერთიანი რუსეთის“ რეიტინგი 40%-მდე დაეცა, მაშინ, როცა მაისში 48%-ს აღწევდა.
ფონდის ექსპერტების შეფასებით, მოქალაქეები უარყოფითად აღიქვამენ როგორც რიგ ამკრძალავ კანონს, ასევე, საქონელსა და პროდუქტებზე ფასებისა და საბინაო-კომუნალური მომსახურების ტარიფების მკვეთრ ზრდას, რამაც ზოგიერთ რეგიონში რეკორდული 15-21% შეადგინა.
“ხალხმა ცხოვრების დონის გაუარესება იგრძნო,“ - წერს ფონდი.
