პოლონეთის ხელისუფლება რამდენიმე ქვეყნისთვის უვიზო რეჟიმის გაუქმების შესახებ განაცხადის შეტანას აპირებს. ამის შესახებ პოლონეთის შინაგან საქმეთა მინისტრის მოადგილე ჩესლავ მროჩეკმა რადიოსადგურ RMF24-ის ეთერში განაცხადა.
„დიდი ალბათობით, შენგენის შეთანხმების ფარგლებში რამდენიმე ქვეყნისთვის უვიზო რეჟიმის გაუქმების მოთხოვნით განაცხადს შევიტანთ,“ - აცხადებს მროჩეკი.
ის კონკრეტულ ქვეყნებს არ ასახელებს და ამბობს, რომ შეზღუდვები იმ სახელმწიფოებზე გავრცელდება, რომელთა მოქალაქეებიც პოლონეთში კანონს რეგულარულად არღვევენ. მროჩეკმა მაგალითისთვის კოლუმბია მოიყვანა, რომლის მოქალაქეებსაც 2024 წლის აგვისტოში ვარშავამ სამუშაო ვიზის მიღება დაავალდებულა, თუ მგზავრობის მიზანი შესაბამისია.
პოლონეთის პოლიციის სტატისტიკის მიხედვით, ჩადენილი დანაშაულების რაოდენობით უცხოელებს შორის საქართველოს, უკრაინისა და ბელარუსის მოქალაქეები ლიდერობენ.
ამასთან, როგორც ახლახან პოლონეთის პრემიერ-მინისტრმა დონალდ ტუსკმა განაცხადა, ის გეგმავს, ევროკავშირის კოლეგები საქართველოს მოქალაქეებისთვის უვიზო რეჟიმის გაუქმების აუცილებლობაში დაარწმუნოს. თუმცა ქვეყნის საგარეო საქმეთა მინისტრ რადოსლავ სიკორსკის თქმით, ის საქართველოს მოქალაქეებისთვის უვიზო რეჟიმის გაუქმებაში აზრს ვერ ხედავს და ევროკავშირი მხოლოდ ქვეყნის ხელისუფლების წარმომადგენლების წინააღმდეგ პირადი სანქციების დაწესებით უნდა შემოიფარგლოს.
