საქართველოს პრემიერის ირაკლი ღარიბაშვილის თქმით, აღმოსავლეთ პარტნიორობის სამიტი საქართველოს მოქალაქეებისთვის კონკრეტული, ხელშესახები შედეგებით დასრულდა.
როგორც პრემიერმა აღნიშნა, წელს საკმაოდ წარმატებული საგარეო პოლიტიკა იქნა წარმოებული საქართველოს მთავრობის მხრიდან.
ღარიბაშვილის თქმით, რამდენიმე დღის წინ მან მონაწილეობა მიიღო აღმოსავლეთ პარტნიორობის მე-6 სამიტში, სადაც სამიტის პოლიტიკურ დეკლარაციაში ასახულია საქართველოსთვის პრიორიტეტული ძირითადი საკითხები და აღიარებულია ქვეყნის ევროპული არჩევანი და მისწრაფებები.
"წელს საკმაოდ წარმატებული საგარეო პოლიტიკა ვაწარმოეთ, საერთაშორისო ასპარეზზე მივიღე მონაწილეობა უმაღლესი დონის ფორუმებსა და შეხვედრებში. ორი დღის წინ მე დავბრუნდი ბრიუსელიდან, სადაც მონაწილეობა მივიღე აღმოსავლეთ პარტნიორობის მე-6 სამიტში, რომელიც საქართველოს მოქალაქეებისთვის კონკრეტული, ხელშესახები შედეგებით დასრულდა. სამიტის პოლიტიკურ დეკლარაციაში ასახულია ჩვენთვის პრიორიტეტული ძირითადი საკითხები და აღიარებულია ჩვენი ევროპული არჩევანი და მისწრაფებები. ბრიუსელში ვიზიტის ფარგლებში,NATO-ს გენერალურ მდივანთან მქონდა შეხვედრა. განვიხილეთ ჩვენი ურთიერთობების დღის წესრიგი. NATO-ს წევრობა, რასაც მხარს უჭერს მოსახლეობის აბსოლუტური უმრავლესობა, ჩვენი ქვეყნის საგარეო და უსაფრთხოების პოლიტიკის პრიორიტეტულ საკითხს წარმოადგენს. საქართველოს აქვს ყველა პრაქტიკული ინსტრუმენტი NATO-ში შესასვლელად და მნიშვნელოვანია, მომზადდეს პოლიტიკური გადაწყვეტილება NATO-ში საქართველოს გაწევრიანებასთან დაკავშირებით. NATO-ს გენერალურმა მდივანმა განსაკუთრებულად აღნიშნა ჩვენი ძალისხმევა საერთაშორისო ტერორიზმის წინააღმდეგ ბრძოლაში, რომელსაც ავღანეთში მრავალი წლის განმავლობაში ვახორციელებდით, ასევე ავღანეთიდან ათასობით ადამიანის ევაკუაციის პროცესში მონაწილეობისთვის მადლიერება გამოხატა NATO-ს გენერალურმა მდივანმა. ასევე, მსურს კიდევ ერთხელ შევეხო საკითხს, რომელიც ეხება პირდაპირი უცხოური ინვესტიციების მოზიდვას. როგორც იცით, ბრიუსელში კომპანია "Rothschild & Co"- სთან მნიშვნელოვან შეთანხმებას მოვაწერეთ ხელი. მე მინდა მოსახლეობას განვუმარტო, რომ კომპანია "Rothschild-ი", მსოფლიოს ერთ-ერთი უმსხვილესი ფინანსური ჯგუფია, მსოფლიოში რიგით მეორე და ევროპაში პირველი, რომელიც საქართველოს რეგიონულ ფინანსურ ჰაბად გარდაქმნის სტრატეგიის განვითარებაზე იწყებს მუშაობას, ასევე ინვესტიციების, ინვესტორების და დამატებითი ფინანსური რესურსების მოზიდვის მიმართულებით იმუშავებს," - განაცხადა ირაკლი ღარიბაშვილმა.
