საქსტატმა დღეს საგარეო ვაჭრობის წინასწარი ანგარიში გამოაქვეყნა, რომლის თანახმადაც 2025 წლის თებერვალში საქართველოს იმპორტი 1.1 მილიარდ დოლარს შეადგენდა, რაც წლიურად 7%-ით არის შემცირებული.
ჯამურად იანვარ-თებერვლის იმპორტი კი, 2.7 მილიარდი დოლარი იყო (ზრდა 19.5%-ით), მაგრამ აქედან 500 მილიონ დოლარზე მეტი ქვეყანაში ძვირად ღირებული ნახატებისა და ქანდაკებების იმპორტზე მოდიოდა, მის გარეშე კი რეალური იმპორტი 2.2 მილიარდი დოლარი იყო.
რაც შეეხება ექსპორტს, მისი მოცულობაც წლიურად 7%-ით შემცირდა და 431.5 მილიონი დოლარი შეადგინა. მთლიანად იანვარ-თებერვალში კი, ექსპორტი 835 მილიონი დოლარის ტოლი იყო. ეს მაჩვენებელი წლიურად 4%-ით არის გაზრდილი, რაც იანვარში ექსპორტის 18%-იანი ზრდით იყო განპირობებული.
უფრო დეტალურად, თუ რა საქონლის იმპორტი და ექსპორტი შემცირდა 2025 წლის თებერვალში, ცნობილი გახდება 19 მარტს, როდესაც საქსტატი საგარეო ვაჭრობის დეტალურ ანგარიშს გამოაქვეყნებს.
