თბილისის სასწრაფო სამედიცინო დახმარების თანამშრომლები ხელფასების 100-პროცენტიან მატებას მოითხოვენ. ისინი პროფკავშირების წარმომადგენლებთან ერთად, საგანგებო სიტუაციების კოორდინაციისა და გადაუდებელი დახმარების ცენტრის წინ შეიკრიბნენ.
გარდა ამისა, როგორც სასწრაფო სამედიცინო დახმარების თანამშრომლები აცხადებენ, უკვე ერთი თვეა, მოეხსნათ დანამატი, რომელსაც სახელმწიფო კოვიდპროგრამის გათვალისწინებით გასცემდა. მათივე თქმით, გამოძახებების სტატისტიკა არ შემცირებულა და დანამატის მოხსნა, უსამართლო გადაწყვეტილებაა.
სასწრაფოს თანამშრომლების განცხადებით, აქციის გამართვამდე მათ შეხვედრა ჰქონდათ ჯანდაცვის მინისტრის მოადგილეებთან, რომელთა მხრიდან მიიღეს დაპირება ღირსეული პირობების შექმნის შესახებ, თუმცა, როგორც აქციის მონაწილეები აცხადებენ, ფინანსური კუთხით არაფერი შეცვლილა.
ამასთან, აქციაზე სასწრაფოს თანამშრომლებმა პროფკავშირებთან თანამშრომლობით, ხელფასების მატებასთან დაკავშირებით ხელი მოაწერეს განცხადებას, რომელსაც საგანგებო სიტუაციების კოორდინაციისა და გადაუდებელი დახმარების ცენტრსა და ჯანდაცვის სამინისტროს გაუგზავნიან.
