ჯანდაცვის სამინისტროს, „COVAX პალტფორმისა“ და „ფაიზერის“ სათაო ოფისის წარმომადგენლებს შორის ონლაინ ფორმატში შეხვედრა გაიმართა. ამის შესახებ, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ თამარ გაბუნიამ დღეს გამართულ ბრიფინგზე განაცხადა.
მხარეებმა შეხვედრაზე ის დამატებითი პირობები დააზუსტეს, რაც „ფაიზერის“ ვაქცინის მოწოდებისთვის ქართულმა მხარემ უნდა გაითვალისწინოს. შეთანხმდნენ ქვეყანაში ვაქცინის შემოტანის ეტაპებზე. ვაქცინაციის პროცესი მარტის ბოლომდე დაიწყება.
„შეხვედრაზე „ფაიზერის“ ვაქცინის მოწოდებისთვის დამატებითი პირობები დავაზუსტეთ. დეტალურად გავიარეთ ქვეყანაში „ფაიზერის“ ვაქცინის შემოტანის ყველა ეტაპი, მათ შორის, ცივი ჯაჭვის მოთხოვნები, იმ ცენტრების შესახებ ინფორმაცია, სადაც აეროპორტიდან ვაქცინების გადატანა მოხდება და ასევე სამედიცინო დაწესებულებები, სადაც ვაქცინაციის პროცესი უშუალოდ განხორციელდება. აღსანიშნავია, რომ მარეგულირებლის მიერ კლინიკები უკვე დიდი ხანია შერჩეულია და ეს ინფორმაცია „ფაიზერის“ სათაო ოფისში საბოლოო დასტურისთვის უკვე გაგზავნილია. „ფაიზერით“ ვაქცინაციის პროცესი მარტის ბოლომდე დაიწყება.“- განაცხადა თამარ გაბუნიამ.
თამარ გაბუნიას განცხადებით, „იუნისეფმა“ უკვე მიიღო დასტური „ასტრაზენეკასგან“ ვაქცინის პირველი დოზების მოწოდების საკითხზე.
„„იუნისეფმა“ მიიღო „ასტრაზენეკასგან“ დასტური და იმ 129 600 დოზიდან, რომელიც მაისის ბოლომდე უნდა მიგვეღო, პირველი ნაწილი მარტის ბოლომდე ჩამოვა. მოსალოდნელია, რომ 22 მარტის კვირაში მივა „იუნისეფთან“ და შემდეგ გამოიგზავნება საქართველოში.“ - განაცხადა მინისტრის მოადგილემ.
აღსანიშნავია, რომ საქართველო 140 ქვეყნიდან იმ 18 ქვეყანას შორისაა, რომელიც გამონაკლისის სახით, დაჩქარებული წესით ვაქცინას „ფაიზერისგან“ წლის პირველ კვარტალში მიიღებს.
