„უცხოური გავლენის გამჭვირვალობის შესახებ“ კანონთან დაკავშირებით არ ვართ ჩართული კონსულტაციებში, რადგან ეს კანონი არ შეეხება ჩვენს საფინანსო სექტორს, – ამის შესახებ ეროვნული ბანკის პრეზიდენტობის მოვალეობის შემსრულებელმა, ნათია თურნავამ განაცხადა.
ამასთან, მისივე განმარტებით, საბანკო საიდუმლოება დაცულია კანონით.
„პირველ რიგში, ცნობილია, რომ ის ფიზიკურ პირებს საერთოდ არ ეხება და, ზოგადად, საბანკო კონფიდენციალურობა დაცული არის სპეციალური კანონმდებლობით, რომელიც არეგულირებს საბანკო სექტორს. აქედან გამომდინარე, კანონს ჩვენთან პირდაპირი შეხება ამ კუთხით არ აქვს. ზოგადად, გამჭვირვალობას მივესალმებით, ჩვენ ვართ ერთ-ერთი ყველაზე გამჭვირვალე სტრუქტურა. ბუნებრივია, რომ ჩვენ არც უნდა ვიყოთ ამ პროცესში ჩართული. ვფიქრობ, რომ ამაზე კანონის ავტორებმა ამომწურავი განმარტება გააკეთეს. ეს კანონი არ შეეხება ფიზიკურ პირებს. საბანკო სექტორს რაც შეეხება, საბანკო საიდუმლოება დაცულია კანონით. მხოლოდ ეს შემიძლია ვთქვა, დანარჩენზე უფრო კომპეტენტურ ორგანოებს შეგიძლიათ მიმართოთ“, – აღნიშნა თურნავამ.
