ეკონომიკის თავისუფლების ინდექსით საუკეთესო ოცეულში მოხვედრა ნიშნავს, რომ ხელისუფლება სწორ პოლიტიკას ახორციელებს, – ამის შესახებ დედაქალაქის მერმა, კახა კალაძემ განაცხადა.
კახა კალაძეს კითხვა დაუსვეს ამერიკული კვლევითი ორგანიზაცია „ჰერითიჯ ფაუნდეიშენის“ მიერ გამოქვეყნებულ 2025 წლის ეკონომიკის თავისუფლების ინდექსზე, რომლის მიხედვითაც, საქართველო ევროპის საუკეთესო ოცეულშია.
კალაძის თქმით, რომ არა მშვიდობის შენარჩუნება, ქვეყანაში ეკონომიკური განვითარება და კეთილდღეობა ვერ იქნებოდა.
„პირველი და მნიშვნელოვანი იყო მშვიდობის შენარჩუნება. მშვიდობა რომ არა, ვერც ეკონომიკური განვითარება გვექნებოდა და ვერც ეკონომიკური კეთილდღეობა. მშვიდობის შენარჩუნება ბევრი შეურაცხყოფის, მუქარისა და შანტაჟის ფონზე მოგვიწია, რომელიც სამწუხაროდ, ცალკეული ევროპელი ბიუროკრატების მხრიდან დღესაც გრძელდება. ამ ყველაფრის მიუხედავად, ჩვენ, რა თქმა უნდა, გავატარებთ ქვეყნის ინტერესს, მოვახდენთ ქვეყნის ეკონომიკურ განვითარებას. მშვიდობას დღეს ალტერნატივა არ აქვს, როგორც ქვეყნის შიგნით, ასევე მსოფლიოს ნებისმიერ წერტილში. ამის შესახებ აშშ-ის პრეზიდენტიც პირდაპირ საუბრობს, რომ მშვიდობა უმნიშვნელოვანესია. ის შედეგები, რასაც ჩვენ ეკონომიკის განვითარების თვალსაზრისით ვიღებთ, ზუსტად აქედან გამომდინარეა“, – აღნიშნა თბილისის მერმა.
