ეკონომიკისა და მდგრადი განვითარების მინისტრის ლევან დავითაშვილის განცხადებით, მთავრობა მწვანე წყალბადის პოტენციალს სწავლობს და ამ პროცესში გერმანიის რეკონსტრუქციის ბანკიც არის ჩართული.
საუბარია მწვანე წყალბადის განვითარების პროექტის წინასწარი ტექნიკურ-ეკონომიკური დასაბუთების კვლევაზე, რომელსაც საქართველოს ენერგეტიკის განვითარების ფონდი KFW-სთან ერთად ახორციელებს.
“მწვანე წყალბადის პოტენციალის შესახებ ვმუშაობთ და კონცეფციაც ჩამოყალიბებული გვაქვს. ამასთან, საკმაოდ საინტერესო საპილოტე პროექტს ვახორციელებთ გერმანიის რეკონსტრუქციის ბანკთან [KFW] ერთად. იმედი გვაქვს, რომ ბათუმში მწვანე წყალბადზე გვეყოლება საზოგადოებრივი ტრანსპორტი. ეს მთელი ჯაჭვია, რა დროსაც საჭიროა გენერაციის, გადაცემისა და შენახვის ობიექტები. კვლევა საშუალებას მოგვცემს შევაფასოთ რამდენად მასშტაბურად შეგვიძლია გამოვიყენოთ მწვანე წყალბადი”,-ამბობს დავითაშვილი.
ინფორმაციისთვის, მწვანე წყალბადი მიიღება ელექტროლიზის საშუალებით, მწვანე კი იმიტომ რომ მის მისაღებად გამოიყენება განახლებადი ენერგიის წყაროები: ქარი, მზე და წყალი. წყალბადი გამოიყენება როგორც ენერგია, რომლისგანაც შესაძლებელია ელექტროენერგიის წარმოება ან მისი როგორც აირის მოხმარება. ამ ეტაპზე წყალბადი ყველაზე ხშირად გამოიყენება ნავთობის გადამუშავებისა და სასუქების წარმოებაში.
