საქსტატის პუბლიკაციით, 2025 წლის III კვარტალში მთლიანი შიდა პროდუქტის მოცულობა მიმდინარე ფასებში 27 მლრდ. 980.9 მლნ. ლარს გაუტოლდა, ხოლო წინა წლის შესაბამის პერიოდთან შედარებით რეალური მთლიანი შიდა პროდუქტის ზრდამ 6.4% შეადგინა.
მთლიანი შიდა პროდუქტის დეფლატორის პროცენტული ცვლილება 2025 წლის III კვარტალში 4.7%-ით განისაზღვრა.
მესამე კვარტალში, ზრდის მიმართულებით მნიშვნელოვანი წვლილი შეიტანა შემდეგმა დარგებმა: ინფორმაცია და კომუნიკაცია (21.1%), განათლება (20.7%), საფინანსო და სადაზღვევო საქმიანობები (14.7%), სახელმწიფო მმართველობა და თავდაცვა; სავალდებულო სოციალური უსაფრთხოება (9.7 %), ტრანსპორტი და დასაწყობება (8.1%), ხელოვნება, გართობა და დასვენება (13%), საბითუმო და საცალო ვაჭრობა; ავტომობილების და მოტოციკლების რემონტი (3%).
კლება აღინიშნა შემდეგ დარგებში: სოფლის, სატყეო და თევზის მეურნეობა (-5.4%), ელექტროენერგიის, აირის, ორთქლის და კონდიცირებული ჰაერის მიწოდება (-3.3%), სამთომოპოვებითი მრეწველობა (-8.7%).
მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა ვაჭრობა (15%) და დამმუშავებელი მრეწველობა (9.4%). შემდეგ პოზიციებს იკავებს უძრავ ქონებასთან დაკავშირებული საქმიანობები (8.8%), მშენებლობა (8.4%), ინფორმაცია და კომუნიკაცია (7.4%), სოფლის, სატყეო და თევზის მეურნეობა (7.3%), ტრანსპორტი და დასაწყობება (6.2%), სახელმწიფო მმართველობა (6%), განათლება (5.4%).
