„2023 წლის აპრილის თვეში ეკონომიკურ ზრდაში მნიშვნელოვანი პოზიტიური წვლილი შეიტანა მშენებლობის, საფინანსო და სადაზღვევო საქმიანობების, ტრანსპორტისა და დასაწყობების, ასევე ინფორმაციისა და კომუნიკაციის სექტორებმა. მნიშვნელოვანია, რომ აპრილის თვეში 20.4 პროცენტით გაზრდილია ექსპორტის მოცულობაც, ხოლო წლის პირველ კვარტალში ტურიზმიდან მიღებული შემოსავლების ზრდამ 100 პროცენტს გადააჭარბა“, – აღნიშნა ცინცაძემ.
მინისტრის მოადგილის შეფასებით, მთავრობის მიერ განხორციელებულ და მიმდინარე მხარდაჭერის ღონისძიებებს მცირე და საშუალო ბიზნესის კონკურენტუნარიანობის გაუმჯობესების, ინვესტიციების მოზიდვის, სოფლის მეურნეობის, ინფრასტრუქტურის, ინდუსტრიული მიმართულებით მნიშვნელოვანი პოზიტიური გავლენა აქვს ეკონომიკური აქტივობისა და სამუშაო ადგილების ზრდაზე და ხელს უწყობს ქვეყანაში სიღარიბის დონის შემცირებას, რაც კიდევ ერთხელ დადასტურდა 2022 წელს სიღარიბის და შემოსავლების უთანასწორობის მიმართულებით მნიშვნელოვანი გაუმჯობესებით.
საქსტატის წინასწარი მონაცემებით, 2023 წლის აპრილში ეკონომიკურმა ზრდამ 7.5 პროცენტი შეადგინა, ხოლო მიმდინარე წლის იანვარ-აპრილში ეკონომიკური ზრდის საშუალო მაჩვენებელი 7.3 პროცენტს გაუტოლდა.
