საჯარო სამსახურის ბიუროს ლიკვიდაცია 2025 წლის 1-ელი აპრილიდან განხორციელდება. ცნობისთვის, პარლამენტმა საჯარო სამსახურის ბიუროს ლიკვიდაციის ინიციატივას მხარი 20 თებერვალს დაუჭირა. ლიკვიდაციის შემდეგ, ბიუროს ფუნქციები და უფლებამოსილებები მთავრობის ადმინისტრაციას გადაეცემა.
"ქართული ოცნება" გადაწყვეტილების მიზეზად ხარჯების ოპტიმიზაციას და მართვის რაციონალიზაციას ასახელებს, თუმცა თავად საჯარო სამსახურის ბიუროს თანამშრომლების ნაწილი აცხადებს, რომ ბიუროს გაუქმების მიზანია საჯარო სამსახურის წმენდა და კრიტიკული აზრის ჩახშობა.
