საქართველოს ეროვნულ ბანკთან არსებულმა დავების განმხილველმა კომისიამ 2024 წელს განიხილა მომხმარებლებსა და საგადახდო მომსახურების პროვაიდერებს, მათ შორის, ბანკებს შორის წამოჭრილი 90-მდე დავა.
სებ-ის ცნობით, მომხმარებლების მიერ წარდგენილი საჩივრები უმეტესწილად უკავშირდებოდა მის ანგარიშზე განხორციელებულ გადახდის ოპერაციებს, რომლებსაც მომხმარებელი არ ეთანხმებოდა.
როგორც ეროვნულ ბანკში აღნიშნავენ, დავების 85% მომხმარებლების სასარგებლოდ დასრულდა. შესაბამისად, პროვაიდერებმა მომხმარებლებს ჯამურად 300 000 ლარი აუნაზღაურეს.
სებ-ში განმარტავენ, რომ მომხმარებლებისთვის დავების განმხილველი კომისია წარმოადგენს დავის განხილვის სწრაფ, ეფექტურ და უფასო მექანიზმს. კომისია თავის საქმიანობაში დამოუკიდებელი ორგანოა, რომლის შექმნის მიზანს წარმოადგენს საგადახდო მომსახურების მომხმარებელთა უფლებების დაცვა, მათი სამართლიანი მოპყრობის უზრუნველყოფა და ციფრული გადახდების მიმართ მომხმარებლების ნდობის განმტკიცება. ამასთან, აღსანიშნავია, რომ დავების განმხილველი კომისიის შექმნას ითვალისწინებს საქართველოსა და ევროკავშირს შორის ასოცირების შესახებ შეთანხმება.
მომხმარებელი უფლებამოსილია, საჩივრით მიმართოს საქართველოს ეროვნულ ბანკთან არსებულ დავების განმხილველ კომისიას თუ მიიჩნევს, რომ ადგილი ჰქონდა საგადახდო ბარათით, ინტერნეტ-ბანკიდან, მობაილ-ბანკიდან და სხვა განხორციელებულ არაავტორიზებულ (მისი თანხმობის გარეშე განხორციელებულ) ოპერაციებს, გადახდის ოპერაციის შესრულების ვადის დარღვევას, არასწორად შესრულებულ ოპერაციას, ოპერაციის საკომისიოს არასწორად ჩამოჭრას და სხვა მსგავს შემთხვევას.
