საქსტატის ბოლო კვლევის მიხედვით, ქვეყანაში მოქმედი ბაზრობების მესამედზე მეტი (35.1%) თბილისშია კონცენტრირებული. რეგიონებს შორის ლიდერობს იმერეთი 16.5%-ით, შემდეგ მოდის სამეგრელო-ზემო სვანეთი (12.4%) და კახეთი (11.3%).
რა იყიდება ბაზრობებზე?
2025 წლის ოქტომბერში სამომხმარებლო საქონლის რეალიზაციამ (ავტომობილების გარდა) 384.5 მილიონი ლარი შეადგინა. ყველაზე დიდი წილი ტანსაცმელსა და ფეხსაცმელზე მოდის:
- ტანსაცმელი და ფეხსაცმელი — 25.9%5;
- ავეჯი და საოჯახო ნივთები — 23.3%6;
- სურსათი და სასმელები — 21.0%7;
- პირადი ჰიგიენის ნივთები — 11.6%8.
აღსანიშნავია, რომ ავტომობილებით მოვაჭრე სუბიექტების ბრუნვა ბევრად მაღალია და 733.8 მილიონ ლარს აღწევს.
„მოცემულ საანგარიშო პერიოდში, საქართველოს ტერიტორიაზე განთავსებულ ბაზრებსა და ბაზრობებზე, საშუალოდ ვაჭრობდა (ავტომობილებით მოვაჭრე ეკონომიკური სუბიექტების გარდა) 35 ათასი კაცი. ამ მოვაჭრეთა 41.8% ვაჭრობდა ქალაქ თბილისში, 15.7% – იმერეთის, რაჭა-ლეჩხუმის და ქვემო სვანეთის რეგიონში, 9.5 პროცენტი – კახეთში, 8.7% – სამეგრელო-ზემო სვანეთში, 7.0% – შიდა ქართლში, 6.7% – აჭარის ა.რ.-ში, 6.2% – ქვემო ქართლში, 2.4% – მცხეთა-მთიანეთში, 1.1% – სამცხე-ჯავახეთში, ხოლო 0.9% – გურიის რეგიონში.
გამოკვლევის შედეგების მიხედვით, 2025 წლის ოქტომბერში ბაზრებისა და ბაზრობების ტერიტორიაზე მოვაჭრე ეკონომიკური სუბიექტების სავაჭრო ბრუნვის მოცულობის 61.6% ქალაქ თბილისზე მოდიოდა, 15.5% – იმერეთის, რაჭა-ლეჩხუმის და ქვემო სვანეთის რეგიონზე, 6.7% – აჭარის ავტონომიურ რესპუბლიკაზე, 4% – სამეგრელო-ზემო სვანეთის, 3.9% – ქვემო ქართლის, 3.7% – შიდა ქართლის, 2.1% – კახეთის, 1.8% – სამცხე-ჯავახეთის, 0.4% – გურიის, 0.3% კი – მცხეთა-მთიანეთის რეგიონზე,“ - აღნიშნულია „საქსტატის“ ინფორმაციაში.
სად ვაჭრობენ და სად იხარჯება ყველაზე მეტი?
საქართველოს ბაზრობებზე საშუალოდ 35 000 ადამიანი ვაჭრობს. მათი უმრავლესობა (41.8%) თბილისშია დასაქმებული. დედაქალაქი ასევე ლიდერია ბრუნვის მოცულობით — ქვეყანაში დახარჯული თანხის 61.6% სწორედ თბილისის ბაზრობებზე მოდის.
რეგიონების მიხედვით ბრუნვის განაწილება ასეთია:
- თბილისი: 236.7 მლნ ლარი;
- იმერეთი, რაჭა-ლეჩხუმი და ქვემო სვანეთი: 59.5 მლნ ლარი;
- აჭარა: 25.8 მლნ ლარი;
- სამეგრელო-ზემო სვანეთი: 15.5 მლნ ლარი.
ორგანიზაციული ფორმა
ბაზრების მფლობელი ეკონომიკური სუბიექტების უმრავლესობა (74.7%) შეზღუდული პასუხისმგებლობის საზოგადოებაა (შპს). ინდივიდუალური მეწარმეების წილი 22.2%-ს შეადგენს, ხოლო სააქციო საზოგადოებებისა და კოოპერატივების წილი მინიმალურია და ჯამში მხოლოდ 3.1%-ია.
სტატია მომზადებულია საქსტატის 2025 წლის ოქტომბრის გამოკვლევის საფუძველზე.
BMG
